Qarabağ separatçılarının liderlərinin cinayət işi məhkəməyə göndərilib
Dünən, 19:35.
Qarabağ separatçılarının rəhbərlərinin barəsində cinayət işi baxılmaq üçün Bakı Hərbi Məhkəməsinə göndərilib.
Civilazerbaijan.com bildirir ki, Azərbaycan Baş Prokurorluğunun məlumatına görə,1389 cinayət işi bir icraatda birləşdirilib. Bunlar 1987-ci ilin oktyabrından Azərbaycanın işğal olunmuş ərazilərində qondarma "Dağlıq Qarabağ Respublikası"nın qanunsuz silahlı birləşmələri tərəfindən törədilmiş cinayətlərə aiddir.
Toplanmış sübutlar əsasında 2548 epizod üzrə 15 nəfər cinayət məsuliyyətinə cəlb edilib: Qukasyan (Ğukasyan) Arkadi Arşaviri (Arşaviroviç), Harutyunyan Arayik Vladimiri (Vladimiroviç), Sahakyan Bako Sahaki, İşxanyan Davit Rubeni, Babayan Davit Klimi (Klimoviç), Mnatsakanyan Lyova Henrixi, Manukyan Davit Azati, Martirosyan Qarik Qriqori, Paşayan Melikset Vladimiri, Allahverdiyan Davit Nelsoni, Stepanyan Qurqen Homerosi, Balayan Levon Romiki, Babayan Madat Arakeli (Arakeloviç), Beqlaryan Vasili İvani və Qazaryan Erik Roberti.
Onlara qarşı Azərbaycan Cinayət Məcəlləsinin 100 (təcavüzkar müharibəni planlaşdırma, hazırlama, başlama və aparma), 102 (beynəlxalq müdafiədən istifadə edən şəxslərə və ya təşkilatlara hücum etmə), 103 (soyqırım), 105 (əhalini məhv etmə), 106 (köləlik), 107 (əhalini deportasiya etmə və ya məcburi köçürmə), 109 (təqib), 110 (insanları zorakılıqla yoxa çıxarma), 112 (beynəlxalq hüquq normalarına zidd azadlıqdan məhrum etmə), 113 (işgəncə), 114 (muzdluluq), 115 (müharibə qanunlarını və adətlərini pozma), 116 (silahlı münaqişə zamanı beynəlxalq humanitar hüquq normalarını pozma), 118 (hərbi soyğunçuluq), 120 (qəsdən adam öldürmə), 192 (qanunsuz sahibkarlıq), 214 (terrorçuluq), 214-1 (terrorçuluğu maliyyələşdirmə), 218 (cinayətkar birlik (təşkilat) yaratma), 228 (qanunsuz olaraq silah, onun komplekt hissələrini, döyüş sursatı, partlayıcı maddələr və qurğular əldə etmə, başqasına vermə, satma, saxlama, daşıma və gəzdirmə), 270-1 (aviasiya təhlükəsizliyinə təhdid yaradan əməllər), 277 (dövlət xadiminin və ya ictimai xadimin həyatına sui-qəsd etmə), 278 (hakimiyyəti zorla ələ keçirmə və onu zorla saxlama, dövlətin konstitusiya quruluşunu zorla dəyişdirmə), 279-cu (qanunvericiliklə nəzərdə tutulmayan silahlı birləşmələri və qrupları yaratma) maddələrilə ittihamlar irəli sürülüb.
Həm ibtidai istintaqın gedişində, həm də ibtidai istintaq tamamlandıqdan sonra təqsirləndirilən şəxslər tərəfindən verilmiş vəsatət və şikayətlərə cinayət-prosessual qanunvericiliyin tələblərinə uyğun şəkildə baxılaraq müvafiq qərarlar qəbul edilib,
Eyni zamanda çoxsaylı cinayətlər törətməkdə ittiham olunan digər şəxslərin barəsində cinayət işi ayrıca icraata ayrılaraq ibtidai istintaq davam etdirilir.
Azərbaycan Baş Prokurorluğu bu istintaq işi ilə əlaqədar qeyd olunan epizodlar üzrə şübhəli bilinən, eləcə də şahid qismində bir çox şəxslərin Ermənistan Respublikasının ərazisində olmasına ciddi əsasları rəhbər tutaraq, Ermənistan Respublikasının aidiyyatı orqanlarını əməkdaşlığa dəvət edir. Cinayət işi üzrə ittiham aktı Azərbaycanın baş prokuroru tərəfindən 16 dekabr 2024-cü il tarixində təsdiq edilərək baxılması üçün aidiyyatı üzrə Bakı Hərbi Məhkəməsinə göndərilib, məlumatda deyilir.
Qeyd edək ki, məlumatda keçmiş "dövlət naziri" Ruben Vardanyanın adı çəkilməyib. Onun işinə Azərbaycan Dövlət Təhlükəsizliyi Xidmətində baxılır. Vardanyanın vəkillərinin məlumatına görə, ona qarşı ağır cinayətlərlə bağlı 45 ittiham irəli sürülüb. Onun işi üzrə materialı 100 cilddən ibarətdir.
Geri qayıt