Türkiyədə Məhəmməd peyğəmbəri təsvir etdiyi iddia edilən jurnala cinayət işi açılıb - FOTO
1-07-2025, 20:55.
Türkiyədə Məhəmməd peyğəmbəri təsvir etdiyi iddia olunan “LeMan” karikatura jurnalı haqqında cinayət işi açılıb.
Civilazerbaijan.com bildirir ki, cinayət işi çərçivəsində jurnalın təsisçisi, yazı işləri müdiri, dizayneri və müəssisənin müdiri saxlanılıblar. Jurnalın baş redaktoru Tuncay Akgün isə ölkə xaricində olduğundan haqqında qiyabi həbs qərarı verilib.
Daxili işlər naziri Əli Yerlikaya “X” hesabında verdiyi açıqlamada "peyğəmbərimizə (s.ə.s.) karikatura çəkərək nifaq salmağa çalışanları bir daha qınadığını" deyib.
Jurnalın sözügedən karikaturası iyunun 26-da dərc olunub. Karikaturada İsrailin Qəzza zolağını bombalaması fonunda Məhəmməd adlı bir müsəlman və Musa adlı bir yəhudinin salamlaşması təsvir olunur.
Jurnal verdiyi açıqlamada peyğəmbərin təsvir olunmasını inkar edib.
“Dünyada 200 milyon insanın daşıdığı Məhəmməd, Mehmet, Mamadu kimi adlar peyğəmbərimizin adını yaşatmaq üçün müsəlmanlar tərəfindən qoyulur. Biz bu həssaslığı bilirik və başa düşürük. Bizim karikaturamızda peyğəmbərin təsviri yoxdur. Bunu təhrif etmək üçün pis niyyətli olmaq lazımdır. Biz üzərimizə atılan ləkəni qəbul etmirik”, - açıqlamada deyilir.
Karikaturanın sosial mediada rezonans doğurmasının ardınca xeyli etirazçı jurnalın redaksiyasının yerləşdiyi binaya hücum edib, içəri daxil olmağa çalışıb.
Onlar “Yaşasın şəriət” şüarı səsləndirib və bina önündə namaz qılıblar. Polis izdihamı dağıtmaq üçün gözyaşardıcı qazdan istifadə edib, Toplum TV-nin məlumatında qeyd olunur.
Geri qayıt