Azərbaycanın Moskvadakı konsulluğu qarşısında etiraz aksiyası keçirilib
27-08-2025, 19:38.
“Başqa Rusiya” (“Другая Россия”) Milli-Bolşevik Partiyasının fəalları Azərbaycanın Moskvadakı konsulluğu qarşısında aksiya keçiriblər.
Civilazerbaijan.com bildirir ki, etirazçılar əllərində Azərbaycan prezidenti İlham Əliyevin fotosu olan plakat tutublar. Aksiya Rusiya-Azərbaycan münasibətlərində son vaxtlar yaranmış gərginlik fonunda keçirilib. Etirazçılar Azərbaycanda saxlanılan rusiyalı jurnalistlərin azad olunmasını və Bakıda fəaliyyətini dayandırmış Rus Evinin yenidən açılmasını tələb ediblər. Onlar həmçinin Azərbaycanın Ukraynaya yardım göndərməsinə qarşı çıxıblar.
“Azərbaycan prezidenti Əliyev rusofobiya oyunu oynamağa qərar verib. Kiyev rejimi ilə mehriban münasibətlər saxlayır, ona hərbi və mülki təchizatla yardım edir, Rusiya ilə müharibəni dəstəkləyir. Əliyev Bakıda Rus Evini bağlayıb, rusiyalı jurnalistləri həbsə atır, ölkəmizlə dostluq etmək istəyənlərin səsini kəsir. Bununla yanaşı, Bakı diaspordan böyük pullar qazanır. Yüzminlərlə azərbaycanlı burada – Rusiyada yaşayır və pul qazanırlar, milyarderlər siyahısında onların sayı kifayət qədərdir. Əliyev düşünür ki, eyni zamanda həm Rusiyanın hesabına dolanmaq, həm də ona qarşı təhqiramiz davranmaq olar? Alınmayacaq!”, – etirazçılar bildiriblər.
Aksiya iştirakçıları Azərbaycan hökumətindən, bu il iyunun 30-da Daxili İşlər Nazirliyi tərəfindən “Sputnik Azərbaycan”ın ofisində keçirilmiş əməliyyat zamanı saxlanılan jurnalistlər İqor Kartavıx və Yevgeni Belousovun azad olunmasını tələb ediblər. Onlar dələduzluq, qanunsuz sahibkarlıq və külli miqdarda gəlir əldə etmə kimi ittihamlarla 4 aylıq həbs olunublar.
Konsulluq qarşısında keçirilən aksiya zamanı polis üç iştirakçını – Qleb Yejovu, Daniil Şmalkonu və İvan Qubini – saxlayıb.
“Başqa Rusiya” 2010-cu ildə yazıçı və siyasi fəal Eduard Limonov tərəfindən yaradılıb. Hərəkat daha əvvəl qadağan edilmiş Milli-Bolşevik Partiyasının davamçısı hesab olunur və radikal ideoloji mövqeləri ilə tanınır.
Rusiya ilə Azərbaycan arasında münasibətlər 2024-cü il dekabrında Azərbaycan Hava Yollarına (AZAL) məxsus sərnişin təyyarəsinin Qazaxıstanda qəzaya uğramasından sonra pisləşib. Prezident İlham Əliyev təyyarənin Rusiya ordusu tərəfindən vurulduğunu iddia edib.
Növbəti gərginlik isə iyunun 27-də Yekaterinburqda iki nəfər azərbaycanlının ölümü, digərlərinin isə saxlanılmasından sonra baş verib. Bunun ardınca Azərbaycanda rus vətəndaşlara qarşı reydlər və həbslər başlayıb. Bu həbslər fonunda Rusiya dövlətinə məxsus və Bakıda fəaliyyət göstərən “Sputnik Azərbaycan”ın əməkdaşları da həbs ediliblər.
Daha sonra isə Rusiya Bakıda saxlanılan rusiyalı jurnalistlərə görə, Azərbaycan isə Yekaterinburqda azərbaycanlılara qarşı keçirilən əməliyyata görə bir-birinə qarşılıqlı nota veriblər.
İlham Əliyev avqustun 26-da “Əl-Ərəbiyyə” telekanalına müsahibəsində iki ölkə arasındakı gərginliyə görə Azərbaycanın məsuliyyət daşımadığını deyib, Meydan TV-nin məlumatında qeyd olunur.
Geri qayıt