Ermənilər Azərbaycanın gizli Qarabağ planından qorxuya düşdü -
11-07-2017, 13:58.
"Azərbaycan və Ermənistan arasında hərbi balans çoxdan pozulub. Azərbaycan yalnız Rusiyadan deyil, Türkiyə, Pakistan və İsraildən müasir silahlar alır. Hesab edirəm ki, bizim bilmədiyimiz hansısa böyük oyun gedir, gizli plan var.”
SİVİL.AZ bildirir ki, BAKU.WS-in məlumatına görə, bu sözləri Şuşanın işğalına birbaşa rəhbərlik edən general-mayor Arkadi Ter-Tadevosyan erməni KİV-nə müsahibəsində son vaxtlar Azərbaycan-Ermənistan qoşunlarının təmas xəttində artan hərbi-siyasi gərginliyi şərh edərkən bildirib.
Ötən gün Rusiyadan Azərbaycana gətirilən ən yeni döyüş vasitələrinin növbəti hissəsi Ermənistanda böyük narahatlıq doğurub. Hətta erməni KİV-də xəbər yayılıb ki, Azərbaycanın bu növ döyüş vasitələrini alması ondan xəbər verir ki, rəsmi Bakı Qarabağı azad etmək üçün əməliyyatlara başlayacaq.
Ter-Tadevosyan da hesab edir ki, Azərbaycan və Türkiyənin gələcək hadisələrlə bağlı gizli planları var.
"Azərbaycan müasir silahlar almağa davam edəcək. Çünki onların pulu çoxdur. Mən bilmirəm onlar bu silahlardan necə istifadə edəcəklər, amma onların onları planı var”, - deyə general bildirib.
Ter-Tadevosyan bildirib ki, artıq Qarabağda kiçik miqyaslı döyüşlər geridə qalıb, genişmiqyaslı hərbi əməliyyatlar ola bilər.
Şuşanı işğal edən general bunun qarşısını almaq, Azərbaycana təzyiq etmək üçün dinc sakinlərə hücum planından qərarlılıqla istifadə etməyə eyham vurur. Birinci Qarabağ müharibəsində rəhbərlik etdiyi hərbi əməliyyatlarda mülki Azərbycan əhalisinə qarşı xüsusi qəddarlığı ilə ad çıxarmış Ter-Tadevosyan dinc əhalinin öldürülməsinə haqq qazandırıb. Qeyd edək ki, Ter-Tadevosyan Şuşanın işğal əməliyyatı zamanı Azərbaycan kəndlərinə raket atəşi endirilməsi əmrini verməklə yadda qalıb. O, müsahibələrində dinc əhalini bombalamaqla hərbi əməliyyatlarda üstünlük qazanmağın vacibliyini dəfələrlə vurğulayıb.
"Bu yaxınlarda azərbaycanlı uşaq və nənə atəş nəticəsində həyatını itirdi. Hesab edirəm ki, erməni tərəfi artıq ciddi adekvat zərbələr endirməyə başlayıb. Bunu daha da gücləndirmək lazımdır”, - deyə erməni general bildirib.
Geri qayıt