Almaniyadan deportasiya edilən daha bir azərbaycanlı saxlanılıb
29-01-2022, 14:06.
Keçən il noyabrın 24-də Almaniyadan readmissiya anlaşmasına uyğun olaraq geri qaytarılan Cəfər Mirzəyev dünən Bakıda polis tərəfindən saxlanılıb.
CivilAzerbaijan.com bildirir ki, bu barədə "Turan"-a onun qardaşı Vüsal Mirzəyev məlumat verib. Onun sözlərinə görə, Cəfər Ramana qəsəbəsindəki mağazada mülki şəxslər tərəfindən saxlanılıb və naməlum istiqamətə aparılıb.
Doğmaları yalnız bu gün aydınlaşdıra biliblər ki, o, Sabunçu Rayon Polis İdarəsində saxlanılır.
"Biz oraya getdik, ancaq müstəntiq ilə əlaqə yaradıb saxlanmanın səbəblərini öyrənə bilmədik", - saxlanılan şəxsin qardaşı "Turan"-a bildirib.
Onun sözlərinə görə, Cəfər Almaniyaya 7,5 il öncə qazanc üçün gedib. Siyasi fəaliyyətlə məşğul olmayıb və sosial şəbəkələrdə fəal olmayıb.
Daxili İşlər Nazirliyinin mətbuat xidmətindən şərh almaq mümkün olmayıb.
Almaniyadan deportasiya olunmuş fəallar Malik Rzayev və Mütəllim Orucov 2021-ci ilin oktyabrında narkotik vasitələrin qanunsuz dövriyyəsində ittiham olunaraq həbs ediliblər.
Geri qayıt