Ələsgər Məmmədli və Ruslan İzzətli saxlanılıb
8-03-2024, 14:07.
Müstəqil internet televiziyası olan “Toplum Tv”nin təsisçisi Ələsgər Məmmədli saxlanılıb.
Civilazerbaijan.com bildirir ki, bu barədə məlumatı Tv-nin baş redaktoru Xədicə İsmayıl özünün “Facebook” hesabında paylaşıb.
Ələsgər Məmmədlinin İstanbul Klinikasının qarşısında saxlanıldığı bildirilir. İctimai fəal Nicat Əmiraslanov bildirib ki, 3-cü Respublika Platformasını qurucu üzvü Ruslan İzzətli də saxlanılıb.
“Ruslan İzzətlini Xətai polis İdarəsinin qarşısından qara maşına mindirib apardılar. Çox güman Bakı Şəhər Baş Polis İdarəsindən (BŞBPİ) aparılıb” - o, özünün “Facebook” hesabında yazıb.
Daxili İşlər Nazirliyi isə “Toplum Tv” ilə bağlı daxil olan əməliyyat çərçivəsində əməliyyat aparıldığını bildirib.
Martın 6-sı səhər saatlarında müstəqil internet televiziyası olan Toplum Tv-nin və III Respublika Platformasının ofisinə polis əməliyyatı olub. Ofisdə olan şəxslər kütləvi şəkildə saxlanılıblar. Daxili İşlər Nazirliyi isə əməliyyatın daxil olan məlumat əsasında keçirildiyini bildirib.
Ümumilikdə ondan çox şəxs polis orqanına aparılsa da, onlardan Akif Qurbanova, Fərid İsmayılova, Müşfiq Cabbara, Əli Zeynala, Ramil Babayevə, Elmir Abbasova və İlkin Əmrahova 206.3.2 (qaçaqmalçılıq qrup halında törədildikdə) ittihamı ilə cinayət işi açılıb.
Toplum Tv-nin və III Respublika Platformasının ofisilə yanaşı, tutulanların da evlərinə baxış keçirilib. Vəkillərin verdiyi məlumata görə, polislər ofisdən 30 min avro, tutulanların evlərindən də müxtəlif məbləğlərdə xarici valyuta aşkarladıqlarını bildiriblər.
Hüquq müdafiəçiləri əməliyyatları azad mediaya növbəti hücum kimi dəyərləndirirlər. ABŞ Dövlət Departamenti də “Toplum Tv” əməliyyatını pisləyib və təzyiqləri dayandırmağa çağırıb.
Toplum Tv-nin baş redaktoru Xədicə İsmayıl isə kanalın fəaliyyətini davam etdirəcəyini bildirib, Abzas.org-un məlumatında qeyd olunur.
Geri qayıt