Avropa İttifaqı SEPAH-ı terror təşkilatı kimi tanıyıb
30-01-2026, 14:12.
Avropa İttifaqı (Aİ) ölkələrinin xarici işlər nazirləri yanvarın 29-da İranın İslam İnqilabı Keşikçiləri Korpusunu (SEPAH) “terrorçu” təşkilat kimi tanımaq barədə razılığa gəliblər.
Civilazerbaijan.com bildirir ki, bu barədə Aİ-nin xarici siyasət və təhlükəsizlik məsələləri üzrə ali nümayəndəsi Kaya Kallas sosial media hesabında məlumat verib.
“Öz xalqından minlərlə insanı öldürən istənilən rejim, əslində, öz süqutuna doğru irəliləyir", - deyə o, bu yaxınlarda İranda minlərlə etirazçının öldürülməsinə istinad edib.
Tehran bu addımı tənqid edərək onu “böyük strateji səhv” adlandırıb.
İranın xarici işlər naziri Abbas Əraqçi sosial media hesabında bildirib ki, “hazırda bir neçə ölkə regionumuzda genişmiqyaslı müharibənin qarşısını almağa çalışır, Avropa isə bunun əvəzinə alovun üzərinə benzin tökür.” Əraqçi, həmçinin, qeyd edib ki, Aİ İranın "Milli Ordusunu ‘terror təşkilatı’ kimi tanımaqla daha bir böyük strateji səhvə yol verir.”
İranda bu ayın əvvəli rialın devalvasiyasına qarşı başlayan etirazlar tezliklə böyüyüb və zorakılıqla yatırılıb. İrandan xaricdə yaşayan hüquq müdafiəçiləri indiyədək 6 mindən çox ölənin kimliyini müəyyən ediblər.
İran rəsmiləri isə təxminən 3,100 nəfərin öldüyünü, lakin onların əksəriyyətinin təhlükəsizlik qüvvəsi əməkdaşları olduğunu açıqlayıb.
Geri qayıt