TRIPP layihəsi Ermənistanı regionun əsas ticarət mərkəzinə çevirə bilər - RUBİO
Bu gün, 14:32.
ABŞ dövlət katibi Marko Rubio bildirib ki, TRIPP layihəsi Ermənistanın strateji mövqeyini köklü şəkildə dəyişə və ölkəni regionun əsas ticarət qovşaqlarından birinə çevirə bilər.
Civilazerbaijan.com bildirir ki, Rubio bu barədə ABŞ Senatının Xarici Əlaqələr Komitəsində keçirilən dinləmələr zamanı danışıb.
Dövlət katibi qeyd edib ki, ABŞ və Ermənistan arasında TRIPP layihəsi üzrə saziş imzalanıb. Onun sözlərinə görə, layihə Ermənistanla Azərbaycan arasında sülh sazişinin əsas elementlərindən biri olsa da, əhəmiyyəti bununla məhdudlaşmır.
“Bu layihə Ermənistanın strateji mövqeyini dəyişdirmək və onu regionun mərkəzi ticarət qovşağına çevirmək potensialına malikdir. Layihə Azərbaycanın narahat olduğu nəqliyyat çıxışı məsələsini həll etməyə kömək edir və gərginliyi azalda bilər. Bununla yanaşı, Ermənistan iqtisadiyyatını güclü şəkildə transformasiya etmək imkanına sahibdir”, - Rubio deyib.
ABŞ dövlət katibi TRIPP layihəsini Ermənistan-ABŞ münasibətləri kontekstində də dəyərləndirib. Onun sözlərinə görə, layihə iki ölkə arasında uzun müddət durğun vəziyyətdə olan münasibətlərin canlanmasına təkan verib.
“Uzun illər ərzində Ermənistanla münasibətlərimiz durğun vəziyyətdə idi, bəzi hallarda isə demək olar ki, mövcud deyildi. Bu layihə ölkələrimiz arasında əlaqələri yenidən aktivləşdirib və müxtəlif sahələrdə əməkdaşlıq imkanlarını araşdırmağa şərait yaradıb”, - o bildirib.
Rubio ümid etdiyini vurğulayıb ki, TRIPP marşrutu boyunca özəl investisiyalar cəlb olunacaq və bu, həm ABŞ şirkətlərinin, həm də Ermənistanın, Azərbaycanın və regionun digər ölkələrinin maraqlarına xidmət edəcək.
ABŞ dövlət katibi həmçinin qeyd edib ki, Vaşinqtonun Cənubi Qafqazda fəallaşması Rusiyanın maraqlarına uyğun deyil. Onun sözlərinə görə, Ermənistanın ABŞ ilə münasibətlərinin inkişafı fonunda Moskvanın ölkənin hazırkı baş nazirinin 7 iyun parlament seçkilərindən sonra yenidən hakimiyyətdə qalmasını istəmədiyinə dair əlamətlər mövcuddur.
“Bir məsələyə aydınlıq gətirək: biz burada Ermənistanın suverenliyini pozmaq üçün deyilik. Onlardan digər ölkələrlə münasibətlərini dayandırmağı tələb etmirik. Biz sadəcə, sülhdən kənara çıxan münasibətlər qurmaq istəyirik. Sülh vacibdir, lakin bu yalnız başlanğıcdır”, – Rubio deyib.
Onun sözlərinə görə, TRIPP layihəsi ABŞ şirkətləri və işçiləri üçün də yeni imkanlar yaradacaq, lakin layihənin əsas faydasını Ermənistan vətəndaşları görəcəklər. Rubio bildirib ki, növbəti mərhələdə əsas diqqət layihənin icrasına yönəldilməlidir.
“Amerika şirkətlərinin dəhlizin açılması üçün zəruri olan infrastruktur, dəmir yolu və avtomobil yollarına investisiya yatırmasını təmin etməliyik. Biz bu marşruta nəzarət etmək və ya iqtisadi inhisar yaratmaq istəmirik. Sadəcə, ABŞ şirkətlərinin burada ədalətli paya sahib olmasını və bir çox hallarda erməni şirkətləri ilə əməkdaşlıq etməsini istəyirik ki, bu da qarşılıqlı fayda gətirsin”, - ABŞ dövlət katibi vurğulayıb.
Marko Rubio mayın 26-da Ermənistana səfər edib. Səfər çərçivəsində Ermənistan və ABŞ TRIPP layihəsi üzrə çərçivə sazişini paraflayıblar.
Geri qayıt