Əsas Səhifə > Dünya / Elm və Kültür / Melange / Manşet / Üst manşet > Avropa İttifaqında Rusiyaya qarşı neft embarqosunun MÜZAKİRƏSİ

Avropa İttifaqında Rusiyaya qarşı neft embarqosunun MÜZAKİRƏSİ


21-03-2022, 15:30.
title}


Avropa İttifaqının (Aİ) liderləri Rusiyanın Ukraynaya təcavüzündən dolayı bu ölkəyə neft embarqosunun mümkünlüyünü müzakirə edəcək.

CivilAzerbaijan.com
bildirir ki, bu haqda “Reuters” xəbər yayıb.

Aİ ölkələri xarici işlər nazirlərinin görüşü çərçivəsində Rusiyaya qarşı sanksiyaların beşinci paketini müzakirə edəcəklər. Görüş Brüsseldə ABŞ Prezidenti Joe Bidenin səfəri öncəsi keçiriləcək. Biden Brüsseldə NATO müttəfiqləri ilə görüşəcək, “Böyük Yeddiliy”in sammitinə qatılacaq.

Çoxlu yeni adlar

“Sanksiyaların beşinci paketi üzərində işləyirik və bir çox yeni adlar təklif olunur”, – adının çəkilməsini istəməyən Aİ diplomatı deyib.

“Reuters”in diplomatik mənbələrdən aldığı məlumata görə, embarqonun tətbiqinə Baltik ölkələri təkid edir. Almaniya isə Avropada enerji daşıyıcılarının bahalığı səbəbindən tələsik addımlardan çəkinir. Almaniya Aİ-də Rusiya neftinin ən böyük alıcısıdır.

Rusiya neft embarqosunun Avropada enerjinin kəskin bahalandıracağı haqda xəbərdarlıq edib, sanksiyalara cavabında “Şimal axını-1” kəmərilə qaz nəqlini dayandırmaqla hədələyib. Avropada istehlak olunan qazın 40 faizi Rusiyadan gedir. Son vaxtlar Aİ alternativ enerji mənbələri axtarır.

Rusiya bu il fevralın 24-də Ukrayna ərazisində girib. Bundan sonra Aİ üzvləri və digər ölkələr Rusiyaya qarşı sanksiyalar açıqlayıblar. Sanksiyalar Rusiya mərkəzi bankını, iri bankları, avtomobil sənayesini, Prezident Vladimir Putin daxil olmaqla yüksək çinli məmurları, biznesmenləri, Rusiyanın hərəkətlərinə haqq qazandıran media mənsublarını əhatələyir.

Sanksiyalarda “tabu” yoxdur

Aİ-nin son üç həftədə açıqladığı sanksiyalar 685 rusiyalı və belarusluya şamil edilib.

Ancaq blok indiyədək Rusiya neftinə embarqo qoymaq kimi çətin qərarı verməkdə tərəddüd edib. Birləşmiş Ştatlar və Britaniya isə bu addımı atıblar.

Fransa Prezidenti Emmanuel Makron deyir ki, Ukraynada vəziyyət pisləşərsə, sanksiyalar məsələsində “tabu” ola bilməz.

“Bu sanksiyaların məqsədi Prezident Putini yenidən düşünməyə vadar etməkdir. Tərəfdaşlarımız və Rusiyayla ticarət edənlər arasında neft və qaz məsələsinə daha həssas yanaşanlar var. Amma prezident tabu olmadığını deyir”, – Fransa prezident idarəsinin rəsmisi deyib.

“Reuters”in həmsöhbətləri deyiblər ki, Rusiya kimyəvi silahdan istifadə edə, yaxud Kiyevi kütləvi bombalayarsa, ona enerji embarqosunun tətbiqinə əsas yaranar.
Geri qayıt