Rusiya Priqojinin qiyam qaldırdığını bildirir
24-06-2023, 15:38.
Rusiyanın Federal Təhlükəsizlik Xidməti Vaqner özəl hərbi şirkətinin təsisçisi Yevgeni Priqojinə “silahlı qiyamın təşkili” ittihamı ilə cinayət işi açıb.
Civilazerbaijan.com bildirir ki, bu barədə iyunun 24-ə keçən gecə Rusiya Baş Prokurorluğu məlumat verib.
Baş Prokurorluq xüsusilə qeyd edir ki, cinayət işi “qanuni və əsaslı” şəkildə açılıb. Sözü gedən ittiham təsdiq olunarsa, 20 illik həbsxana cəzası nəzərdə tutur.
Bundan əvvəl, iyunun 23-də verilən xəbərlərdə deyilirdi ki, Rusiyada Vaqner özəl hərbi şirkətinin təsisçisi Yevgeni Priqojin Rusiya İstintaq Komitəsinə müdafiə naziri Sergey Şoyqudan və Rusiya Silahlı Qüvvələri Baş Qərargahının rəisi Valeri Gerasimovdan rəsmi şikayət edib.
Bu barədə məlumatı bir vaxtlar “Putinin aşpazı” ayamasını qazanmış biznesmenin mətbuat xidməti yayıb.
***
Rusiyanın Moskva şəhərində, eləcə də Moskva və Voronej vilayətlərində "antiterror əməliyyatı" rejimini tətbiq edilib. Bu barədə RİA Novosti məlumat yayıb. Bundan başqa o da qeyd olunur ki, Tula vilayətində “antiterror tədbirlərinin gücləndirilməsi ilə əlaqədar” yerli hakimiyyət həftəsonuna planlaşdırılan bütün kütləvi tədbirləri ləğv edib.
Baş verən hadisələrlə bağlı Rusiya prezidenti Vladimir Putin xalqa müraciət edib. O çıxışında indi baş verənləri 1917-ci il inqilabı ilə müqayisə edib, bunun xarici düşmənlərin Rusiyanı daxildən dağıtmaq planı olduğunu deyib.
Onun sözlərinə görə, ölkənin dağıdılmasına yönəlik bu hadisə orduya və xalqa arxadan vurulan zərbədir. "...belə zərbə Rusiyaya 1917-ci ildə, ölkə birinci dünya müharibəsində olduğu ərəfədə vurulub, onun qələbəsini oğurlayıblar...bu dövlətçiliyin məhv olması, böyük ərazilərin itirilməsi və vətəndaş müharibəsilə nəticələnib."
Putin Rostov-na-Donda mülki və hərbi hakimiyyət orqanlarının işinin praktiki olaraq əngəlləndiyini etiraf edib.
"Rostov-na-Donda vəziyyəti sabitləşdirmək üçün qətiyyətli addımlar atılacaq...", - Putin bildirib.
Priqojin deyir Rostov-na-Dondakı hərbi obyektlərə vaqnerçilər nəzarət edir
Priqojin Rostov-na-Dondakı bütün hərbi obyektlərin artıq "Vaqner"in nəzarətində olduğunu bildirir.
Priqojinə yaxın teleqram kanallarının yazdığına görə, "Vaqner" rəhbəri bildirib ki, Rusiyanın müdafiə naziri Sergey Şoyqu və Rusiya Ordusunun Baş Qərargah rəisi Valeri Gerasimov onlara verilməsə Rostov-na-Donu blokadaya alıb sonra Moskvaya getmək niyyətindədirlər.
***
Videoda Priqojin Rusiya müdafiə nazirinin müavini Yunus-Bek Yevkurov və bir gün əvvəl vaqnerçilərə müraciət edərək, baş verənləri dövlət çevrilişi cəhdi adlandıran general Vladimir Alekseyevlə danışır. Videonun Rostov-na-Dondakı Cənub Hərbi Dairəsinin qərargahının həyətində lentə alındığı bildirilir.
Vaqnerçilər artıq Voronejə daxil olduqlarını bildirirlər.
***
Şahidlər və "Vaqneritlər" özləri PMC döyüşçülərinin nizami ordu əsgərlərinin müqaviməti ilə qarşılaşmadan Rostov-na-Don küçələrində sürdüyü videoları dərc edirlər.
"Rus xalqının soyqırımı"
Priqojin ərizəsində Şoyqu və Gerasimovu “rus xalqının soyqırımında” ittiham edib.
“Glas naroda” saytına İK-yə ərizəsi barədə məlumat verən Priqojin bildirib ki, “Şoyqu və Gerasimov rus xalqının soyqırımına, on minlərlə Rusiya vətəndaşının qətli və Rusiya ərazisinin düşmənə verilməsinə görə birlikdə məsuliyyət daşımalıdırlar”.
Priqojin bunu da əlavə edib ki, bu iki nəfər soyqırımı da, torpaqların düşmənə verilməsini də şüurlu şəkildə ediblər.
Vaqner rəhbəri Şoyqunun milliyyətcə tuvalı olmasını yada salıb.
Bundan əvvəl Priqojin 30 dəqiqəlik video yazmışdı. O bu videoda Rusiyanın siyasi-hərbi rəhbərliyini Ukrayna müharibəsindəki uğursuzluqda, Rusiya prezidenti Vladimir Putinin adminsitrasiyasını isə korrupsiyada ittiham etmişdi.
O habelə Müdafiə Nazirliyini Ukraynada müharibənin əsl səbəbləri barədə yanlış məlumat vermək cəhdində günahlandırmışdı:
“Müdafiə Nazirliyi belə bir əhvalat danışmağa cəhd göstərir ki, guya Ukrayna tərəfindən ağlasığmaz təcavüz olub və onlar NATO bloku ilə birlikdə bizə hücum etmək istəyiblər. Buna görə də fevralın 24-də bədnam xüsusi hərbi əməliyyata tamamilə başqa səbəblərlə başlanıb”.
Bu hələ “birinci hissədir”
Priqojin özünün teleqram kanalında dərc etdiyi yarım saatlıq videonun “hələ birinci hissə” olduğunu deyir.
Biznesmen Moskvanın belə bir iddiasını rədd edib ki, guya Kiyev 8 il ərzində Donbası bombardman edib.
Onun sözlərinə görə Müdafiə Nazirliyi Putini və ictimaiyyəti aldadıb. O iddia edib ki, bu müharibə Şoyqunun marşal rütbəsi alması üçün lazım idi.
Biznesmen bildirib ki, “müharibə oliqarxlara, bugün faktiki olaraq Rusiyanı idarə edən klana lazım idi”:
"Bu oliqarx klanı mümkün olan hər şeyi ələ keçirir. Əgər bu klanın xaricdəki biznesləri bağlanırsa, dövlət əlüstü daxili biznesləri bölüşdürüb onlara ötürür. Elə buna görə də biznesmenləri damlayır, bankları bağlayırlar ki, klan öz pullarının həcmini itirməsin”.
Priqojin bunu da bəyan edib ki, 2014-cü ildən 2022-ci ilədək Rusiyanın işğal etdiyi Donbas prezident administrasiyası, FTX, habelə oliqarxlar tərəfindən “talanıb”.
Priqojin bu adamların sırasında prezidentin keçmiş köməkçisi Vladislav Surkovun və prezident administrasiyası rəhbərinin müavini Dmitri Kozakın adlarını çəkib.
25 min döyüşçü
Bunun ardınca Priqojin iyunun 23-də axşam yaydığı səs yazısında Rusiya Müdafiə Nazirliyini Vaqner şirkəti birləşmələrinin arxa cəbhədəki düşərgələrini raket atəşinə tutmaqda ittiham edib.
Biznesmenin dediyinə görə Vaqner qrupu döyüşçülərinin arasında çox sayda qurbanlar var. Priqojin raket zərbələrinin hara endirildiyini bildirməyib.
Audioda Priqojinin səsinə bənzəyən səs bəyan edir ki, onun şirkəti “ölkə hərbi rəhbərliyinin simasında şəri” dayandırmaq niyyətindədir.
Priqojin onun qoşunlarına “heç bir müqavimət göstərməməyə” çağırır və bildirir ki, onun qüvvələri onun yolunda duran istənilən blokpostları, qüvvələri və hətta aviasiyanı məhv edəcək.
Biznesmen bildirir ki, onun döyüşçüləri Ukrayna cəbhəsinə yalnız “ədaləti bərpa etdikdən” sonra qayıdacaqlar.
Priqojin bildirib ki, onun ixtiyarında 25 min döyüşçü var və nizami ordunun əsgərləri də daxil, arzu edən bütün rusiyalılar onun qüvvələrinə qoşula bilərlər.
Priqojin bunu da iddia edib ki, müdafiə naziri Şoyqu iyunun 23-də Rostovda olub və onun qorxusundan oradan qaçıb.
Müdafiə Nazirliyi təkzib edir
Rusiya Müdafiə Nazirliyinin məlumatında deyilir ki, sosial şəbəkələrdə Priqojinin adından yayılan məlumatlar və videolar, habelə onun qüvvələrinə Rusiya ordusunun raket zərbələri endirdiyiinə dair xəbərlər həqiqətə uyğun deyil və təxribat xarakteri daşıyır.
Priqojin Rusiya rəhbərliyini Ukrayna müharibəsindəki uğursuzluqlara görə dəfələrlə tənqid edib.
O media texnoloqu Konstantin Dolqova müsahibəsində demişdi ki, Rusiya hakimiyyəti Ukraynada demilitarizasiya məqsədinə çata bilməyib və bu əməliyyat əks-nəticə verib.
AzadlıqRadiosunun məlumatında qeyd olunur ki, onun sözlərinə görə bütün bunların nəticəsində Ukrayna silahlı qüvvələri bugün dünyanın ən güclü ordularından birinə çevrilib.
Geri qayıt