Ukrayna Rusiyanın dəmiryol körpüsünə hücumun məsuliyyətini öz üzərinə götürüb
4-03-2024, 19:23.
Ukrayna bazar ertəsi Rusiyanın cənub-qərbindəki Samara bölgəsində dəmir yolu körpüsünü partlatdığını bildirib.
Civilazerbaijan.com bildirir ki, Ukrayna Hərbi Kəşfiyyat Agentliyinin bildirdiyinə görə, hücum Çapayevka çayı üzərindəki körpünün dayaqlarını hədəf alıb.
Agentlik Rusiyanın körpüdən hərbi yüklərin daşınması üçün istifadə etdiyini bildirib.
Rusiyanın dəmir yolu operatoru Samara bölgəsində baş verən insident barədə məlumat verərək, itkilərin olmadığını, lakin həmin ərazidə xidmətin dayandırıldığını bəyan edib.
Ukrayna prezidenti Volodimir Zelenski bazar günü Qərb ölkələrinə müraciət edərək, sursat çatışmazlığına baxmayaraq, Ukraynanın Rusiyanın hücumlarına qarşı özünü müdafiə etdiyini deyib və gecikən yardımın çatdırılmasını istəyib.
ABŞ Konqresindəki siyasi çəkişmələr səbəbindən ABŞ-ın Ukraynaya yardım paketini dayandırmasına işarə edərək, "Əgər bu baş verərsə, Amerika və ya Avropa İranın “Şahed” pilotsuz təyyarələri və ya Rusiya qırıcıları tərəfindən məğlub edilərsə, bu, tarixin ən utansırıcı səhifələrindən biri olacaq. Rus şərini zəif qərarlar, gecikmələr və ya tərəddüdlər təşviq etməməlidir" deyib.
Zelenski bu sərt müraciətini bazar günü Rusiyanın pilotsuz təyyarəsinin şənbə günü Ukraynanın liman şəhəri Odesadakı yaşayış binasını vurması nəticəsində 5-i uşaq olmaqla, ölənlərin sayının 12 nəfərə yüksəlməsindən sonra edib.
Bazar günü səhər üç uşağın cəsədi dağıntılar altından çıxarıldıqdan sonra Zelenski sosial media platforması X-də "Rusiya ukraynalı uşaqları hərbi hədəfinə çevirib" yazıb.
Odesa vilayətinin qubernatoru Oleh Kiper Telegram kanalında bazar günü axşam saatlarında xilasetmə dəstələrinin əlavə cəsədlərin aşkar etdiyini bildirib. Günün əvvəlində xilasetmə dəstələri dağıntılar altından ana və körpəsinin cəsədlərini çıxarıb.
ABŞ-ın Ukraynaya sonuncu dəfə hərbi sursat göndərməsindən artıq iki aydan çox vaxt keçib. Vaşinqtondakı rəsmilərin Ukraynada silah-sursat çatışmazlığını və ABŞ-dan tədarükün azalmasına görə həyəcanı artır.
Nümayəndələr Palatasının spikeri Mayk Conson Senat tərəfindən qəbul edilən və Ukraynaya mühüm 60 milyard dollarlıq yardım nəzərdə tutan 95 milyard dollarlıq xarici yardım paketini səsverməyə çıxarmaqdan imtina edib. Bu qərar Konqresdə bir neçə ay davam edən gözləmədən sonra paketin həftələrlə gecikməsinə səbəb ola bilər, Amerikanın Səsinin məlumatında qeyd olunur.
Geri qayıt