NİDA Gənclər Hərəkatının fəalı saxlanılıb
22-06-2023, 15:29.
İyunun 21-də axşam NİDA Gənclər Hərəkatının fəalı Elmir Abbasov saxlanılıb.
Civilazerbaijan.com bildirir ki, bu barədə NİDA Gənclər Hərəkatı məlumat verib.
"Elmirin doğmalarının məlumatına görə, dünən axşam saat 22:00-a yaxın o, anasına zəng edib deyib ki, evə gəlir, marketdən bir şey almaq lazımdırmı? Ancaq evə gəlməyib və onunla əlaqə kəsilib. Bu gün məlum olub ki, Elmiri saxlayıblar ", - Hərəkatdan Turan-a bildiriblər.
Azərbaycan Daxili İşlər Nazirliyinin mətbuat xidmətində Abbasovun saxlanılmasını Turan-a təsdiqləyiblər.
"Elmir Abbasov ictimai asayişin pozulması ilə əlaqədar saxlanılıb, araşdırma aparılır", - nazirlikdən bildiriblər.
Lakin onun tərəfdaşları hesab edirlər ki, Abbasov Facebook-da polisi sərt tənqid etdiyinə görə saxlanılıb.
"Elmir dərc etdiyi statusda iyunun 20-də etiraz aksiyası zamanı Gədəbəy rayonunun Söyüdlü kənd sakinlərinə qarşı polis zorakılığını kəskin tənqid edib", - Hərəkat nümayəndəsi deyib.
Elmir Abbasov bundan əvvəl də həbs edilib. 2021-ci ilin fevralında narkotik maddələrdən qanunsuz istifadə ittihamı ilə 30 sutka həbs edilib. O zaman müxalifətçilər onun həbsini hakimiyyətin tənqidilə əlaqələndirmişdilər.
Geri qayıt