Ermənistan ABŞ ilə imzalanan memorandumu dərc edib
Dünən, 19:07.
2025-ci il avqustun 8-də Ermənistanla Amerika Birləşmiş Ştatları arasında imzalanmış üç anlaşma memorandumu, 20 gün sonra, avqustun 29-da dərc olunub.
Civilazerbaijan.com bildirir ki, rəsmiləşdirilmiş sənədlər infrastruktur, süni intellekt və enerji təhlükəsizliyi sahələrində əməkdaşlığın dərinləşdirilməsini nəzərdə tutur.
İlk memorandum Ermənistanın “Sülh kəsişməsi” layihəsini dəstəkləməyə yönəlib. Sənəd tərəflər arasında sərhəd təhlükəsizliyi və infrastrukturun inkişafı sahəsində əməkdaşlıq, ABŞ-nin Daxili Təhlükəsizlik Departamenti ilə Ermənistanın müvafiq qurumları arasında təcrübə mübadiləsi, kibertəhlükəsizlik imkanlarının artırılması və özəl sektor investisiyalarının təşviqi kimi istiqamətləri əhatə edir.
“İki dövlət Ermənistanın suverenliyinə, ərazi bütövlüyünə və beynəlxalq səviyyədə tanınmış sərhədlərinin toxunulmazlığına dəstəyini bildirir. Layihəyə sərmayə yatırmağa, ölkənin infrastrukturunu və sərhəd təhlükəsizliyini yaxşılaşdırmağa qarşılıqlı maraq ifadə olunur. Tərəflər Ermənistanın infrastruktur və sərhəd təhlükəsizliyi sahəsindəki potensialını artırmaq, ölkəni regional və qlobal ticarət üçün səmərəli tranzit mərkəzinə çevirməyə yönəlik birgə niyyətlərini təsdiqləyirlər. Memorandumun məqsədi, iştirakçılar arasında sərmayələr, resurslar, təlimlər və tərəfdaşlıq yolu ilə Ermənistanın infrastruktur və sərhəd təhlükəsizliyinin yaxşılaşdırılması üçün əməkdaşlıq etməkdir”, – sənəddə deyilir.
İkinci memorandum süni intellekt və yarımkeçirici texnologiyalar üzrə tərəfdaşlıqla əlaqədardır. Sənəddə Ermənistanın yarımkeçirici sənayesinə investisiyaların təşviqi, süni intellektin kommersiyalaşdırılması, ixrac nəzarət mexanizmlərinin gücləndirilməsi və ABŞ-Ermənistan arasında birgə elmi fondun yaradılması imkanlarının araşdırılması nəzərdə tutur. Tərəflər həmçinin süni intellektin təhlükəsiz tətbiqi və işçi qüvvəsinin hazırlanması sahəsində əməkdaşlıq edəcəklər.
Üçüncü memorandum enerji təhlükəsizliyi və dayanıqlılığının artırılmasına yönəlib. Tərəflər Ermənistanın enerji sisteminin müasirləşdirilməsi, dinc nüvə enerjisi sahəsində əməkdaşlıq, bərpa olunan enerji üçün saxlama texnologiyalarının inkişafı, elektrik şəbəkələrinin modernləşdirilməsi və kibertəhlükəsizlik imkanlarının gücləndirilməsi sahələrində əməkdaşlıq edəcəklər.
Hər üç sənəd bir il müddətinə qüvvədə olacaq və tərəflərin razılığı ilə əlavə üç dövr üçün uzadıla bilər. Memorandumlar hüquqi və ya maliyyə öhdəliyi yaratmır, tərəflər əməkdaşlığı öz resursları hesabına həyata keçirməyi planlaşdırırlar. İmzalanan sənədlər Ermənistan və ABŞ arasında mövcud strateji tərəfdaşlığı yeni səviyyəyə yüksəltməyi hədəfləyir.
2025-ci il avqustun 8-də Ağ evdə ABŞ prezidenti Donald Tramp, Azərbaycan prezidenti İlham Əliyev və Ermənistan baş naziri Nikol Paşinyan “Beynəlxalq Sülh və Rifah üçün Tramp Marşrutu” (TRIPP) ilə bağlı razılığa gəliblər. Tərəflər arasında memorandumlar imzalanıb.
Rəsmi Bakı Vaşinqtonla imzalanan memorandumla bağlı ictimaiyyətə informasiya verməyib.
Azərbaycan və Ermənistan Qarabağ uğrunda iki müharibə aparıb. Birinci Qarabağ müharibəsi 1988-1994-cü illərə təsadüf edib. İkinci Qarabağ müharibəsi isə 2020-ci ildə baş verib və Moskvanın vasitəçiliyi ilə imzalanmış atəşkəs razılaşması ilə başa çatıb. 2023-cü ildə sentyabrında lokal hərbi əməliyyatlardan sonra Qarabağ tam olaraq Azərbaycanın nəzarətinə keçib. 2025-ci ilin martında sülh sazişi layihəsi yekunlaşsa da, sənəd hələ imzalanmayıb, Meydan TV-nin məlumatında qeyd olunur.
Geri qayıt