Rüfət Səfərovun saxlanılmasına beynəlxalq REAKSİYA

ABŞ Rüfət Səfərovun saxlanılması ilə bağlı prosesi diqqətlə izlədiyini və xəbərdən narahat olduğunu açıqlayıb.

Civilazerbaijan.com bildirir ki, bu barədə ABŞ Dövlət Departamentinin mətbuat katibinin müavini Vedant Patel “Turan”a deyib.

“Hüquq müdafiəçisi Rüfət Səfərovun Azərbaycanda saxlanılması ilə bağlı yayılan xəbərlərdən dərin narahatıq”, – deyə Dövlət Departamentinin mətbuat katibinin müavini bildirib.

O qeyd edib ki, Səfərov Azərbaycanda siyasi motivli həbslər, işgəncələr və hökumət korrupsiyası ilə bağlı hesabatlar hazırlayan “Müdafiə Xətti” hüquq müdafiə təşkilatının rəhbəridir:

“O, insan haqları sahəsində fəaliyyətinə görə Dövlət Departamentinin mükafatına layiq görülüb və bir neçə gündən sonra bu mükafatı almalı idi. Lakin çərşənbə axşamı Bakıda polis tərəfindən saxlanılıb”.

Patel Azərbaycanı “haqsız yerə həbs olunanların hamısını azad etməyə və vətəndaş cəmiyyətinə, o cümlədən hüquq müdafiəçiləri və jurnalistlərə qarşı repressiyalara son qoymağa” çağırıb:


Vedant Patel

“Dünyadakı insan haqları müdafiəçilərinin öz işlərini maneəsiz və qisas qorxusundan azad şəkildə həyata keçirə bilməsi çox vacibdir”.

Avropa Şurası Parlament Assambleyasının (AŞPA) Almaniyadan olan deputatı Frank Şvabe də azərbaycanlı hüquq müdafiəçisi, “Müdafiə Xətti” hüquq müdafiə təşkilatının həmtəsisçisi Rüfət Səfərovun saxlanılmasına reaksiya verib.

Bu barədə Frank Şvabe “X” platformasındakı hesabında yazıb. O, baş verənləri İlham Əliyevin “sülalə hakimiyyəti”nin siyasəti kimi dəyərləndirib.

Şvabe prosesi kinayə ilə belə şərh edib:

“Rüfət Səfərovun saxlanılması İlham Əliyevin ailə və sülalə hakimiyyətinin Azərbaycanın Avropa Şurası Parlament Assambleyasına qayıtması üçün şərtləri yerinə yetirməyə hazır olduğunu göstərir. Bu hazırlığın necə olması isə yanvar ayında AŞPA-nın təqdim etdiyi cavabda əskini tapacaq”.


Frank Şvabe

Qeyd edək ki, “Müdafiə Xətti” insan haqları təşkilatının icraçı direktoru, hüquq müdafiəçisi Rüfət Səfərov dekabrın 3-də saxlanılıb. Ailə üzvləri deyirlər ki, Rüfət Səfərov həbs olunacağı barədə dəfələrlə xəbərdarlıq alıb. Ondan tələb edilib ki, insan haqlarının müdafiəsilə bağlı fəaliyyətini dayandırsın.

Daxili İşlər Nazirliyinin mətbuat xidməti hüquq nüdafiəçisinin saxlandığını təsdiqləyib. DİN-in Mətbuat Xidmətindən bildirilib ki, torpaq alqı-satqısı ilə əlaqədar Rüfət Səfərovla bir nəfər arasında münaqişə olub və bununla bağlı araşdırma aparılır.

Hüquq müdafiəçisinə qarşı Cinayət Məcəlləsinin 178.3.2 (külli miqdarda ziyan vurmaqla dələduzluq) və 221.1 (xuluqanlıq) maddələrilə ittiham irəli sürülüb. İddia olunur ki, hüquq müdafiəçisi torpaq satmaq adıyla Natiq İmamverdiyev adlı şəxsdən pul alıb, mübahisə zamanı onu vurub.

Rüfət Səfərov isə bu ittihamın saxta olduğunu, belə bir şəxsi öncədən ümumiyyətlə tanımadığını, dekabrın 3-də evə gələrkən yaşadığı binanın yanında ona hücum etdiyini, ardınca da polislərin onu tutub apardığını bildirir: “İttiham tamamilə şər və böhtandır, hüquq müdafiəçisi kimi fəaliyyətimlə bağlıdır”.

O bildirib ki, saxlanılması iki gün sonra ABŞ-yə gözlənilən səfərini əngəlləmək üçündür. O, ilin güclü hüquq müdafiəçisi kimi mükafata layiq görülüb və namizədliyini ABŞ-nin Azərbaycandakı səfiri cənab Libbi irəli sürüb. Dediyinə görə, mükafatı ona ABŞ Dövlət katibi Entoni Blinken təqdim edəcəkmiş.

civilazerbaijan.com