AVRO-2020: İtaliya yığması Avropa çempionu oldu

Mənbə: fr.euronews.com (FACUNDO ARRIZABALAGA/AFP)

Futbol üzrə Avropa çempionatında final oyunu keçirilib.

CivilAzerbaijan.com bildirir ki, həlledici qarşılaşmada İngiltərə və İtaliya yığmaları üz-üzə gəlib. Londondakı "Uembli" stadionunda təşkil olunmuş qarşılaşmanı 67 173 nəfər izləyib.

Hesab isə erkən açılıb. 1 dəqiqə 57-ci saniyədə Lük Şou İngiltərə millisini hesabda önə çıxarmaqla yanaşı, Avropa çempionatları tarixinin ən erkən qoluna imza atıb. Bu, meydan sahiblərinin ilk yarı ərzində yeganə təhlükəli epizodu olub.

İtaliya yığması isə bərabərlik qolunu vurmaq üçün hücuma atılıb və istəyinə 67-ci dəqiqədə çatıb. Leonardo Bonuççi rəqib qapısı qarşısındakı qarışıqlıqdan sonra topu tora göndərib - 1:1. Beləliklə, "Yuventus"un müdafiəçisi Avropa çempionatlarının finalları tarixində qol vuran ən yaşlı oyunçu olub. O, 34 yaş 71 günündə fərqlənib.

Digər tərəfdən, İtaliya millisi 13-cü qola imza atmaqla, nəhəng turnirlərdə şəxsi rekordunu yeniləyib. Daha əvvəl 1934, 1982 və 2006-cı il dünya çempionatlarında "Skuadra Adzurra" 12 dəfə fərqlənmişdi.

Görüşün əsas vaxtı elə bu hesabla başa çatıb. Bu, 90 dəqiqə ərzində taleyi həll olunmayan 7-ci final qarşılaşması olub. 1960, 1976, 1996, 2000 və 2016-cı il Avropa çempionatlarında qalib əlavə vaxtda müəyyənləşib. AVRO-1968-də də eyni hal baş verib. Amma reqlamentə əsasən, iki gün sonra yenidən həlledici qarşılaşma keçirilib.

AVRO-2020-də isə əlavə vaxtda da qalib müəyyənləşməyib və nəticədə tarixdə ilk dəfə Avropa çempionu penaltilər seriyasında müəyyənləşib. Bu zaman Roberto Mançininin baş məşqçi olduğu kollektiv daha dəqiq olaraq, qalib gəlib - 3:2. Beləliklə, İtaliya millisi tarixində dördüncü dəfə yüksəldiyi qitə çempionatının final oyununu qələbə ilə başa vurub və ikiqat Avropa çempionu olub.

AVRO-2020
Final
11 iyul

İtaliya - İngiltərə 1:1 (Penalti - 3:2)
Qollar: Leonardo Bonuççi, 67 - Luke Şou, 2.

İtaliya: Canluci Donnarumma, Covanni Di Lorenzo, Corc Kyellini (k), Marko Veratti, Jorjinyo, Nikola Barella, Emerson, Federiko Kyeza, Lorenzo İnsinye, Siro İmmobile, Leonardo Bonuççi.
Ehtiyat oyunçular: Salvatore Siriqu, Aleks Meret, Manuel Lokatelli, Andrea Belotti, Domeniko Berardi, Matteo Pessina, Françesko Açerbi, Bryan Kristante, Federiko Bernardeski, Alessandro Bastoni, Rafael Toloy, Alessandro Florenzi.
Baş məşqçi: Roberto Mançini.

İngiltərə: Cordan Pikford, Kile Uolker, Luke Şou, Deklan Rays, Con Stounz, Harri Maquayr, Rahim Sterlinq, Kalvin Fillips, Mason Maunt, Harri Keyn (k), Kieran Tripiyer.
Ehtiyat oyunçular: Aaron Ramsdeyl, Sam Conston, Cordan Henderson, Markus Reşford, Tiron Minqs, Konor Koadi, Cordan Sanço, Dominik-Kalvert Levin, Riç Ceyms, Bukayo Saka, Cud Bellinqem.
Baş məşqçi: Qaret Sautqeyt.

Baş hakim: Byörn Kuypers (Niderland).

London. "Uembli” stadionu.

civilazerbaijan.com