İranda həbs edilən tələbə Fərid Səfərli Azərbaycana qaytarılıb

İranda həbs edilən azərbaycanlı tələbə Fərid Səfərli azad edilib və Azərbaycana qaytarılıb.

Civilazerbaijan.com bildirir ki, bu barədə Dövlət Təhlükəsizliyi Xidməti (DTX) və Azərbaycan Xarici İşlər Nazirliyinin yanvarın 20-də yaydıqları birgə məlumatda deyilir.

“Azərbaycan Respublikası Prezidentinin tapşırığına uyğun olaraq, Azərbaycan Respublikasının vətəndaşı, 2023-cü ildə İran İslam Respublikasında saxlanılmış Səfərli Fərid Qabil oğlu beynəlxalq hüquqi əməkdaşlıq və qarşılıqlı prosedur çərçivəsində 18.01.2025-ci il tarixində İran İslam Respublikasından təhvil alınaraq ölkəmizə qaytarılmışdır. Fərid Səfərli tibbi müayinədən keçdikdən sonra ailəsinə qovuşmuşdur”, - DTX və XİN-nin birgə press-relizlndə qeyd olunur.

Qeyd edək ki, Almaniyada təhsil alan Azərbaycan vətəndaşı Fərid Səfərli 2023-cü ilin martında birlikdə oxuduğu tanışı ilə görüşmək üçün getdiyi İranda yoxa çıxıb. Sonradan İran hakimiyyəti onun casusluq ittihamı ilə həbs edildiyini təsdiq edib.

Sonradan ittiham "casusluq niyyətinə" tövsif edilib. 2023-cü ilin avqustunda Səfərli 2 illik azadlıqdan məhrumetmə cəzasına məhkum edilib. Noyabrda İranın Apellyasiya Məhkəməsi hökmü qüvvədə saxlayıb.

civilazerbaijan.com