Məhkəmə Tofiq Yaqublunu həbsdə saxlayıb

Bu gün, mayın 6-da Müsavat Partiyasının və Milli Şuranın üzvü Tofiq Yaqublunun ittiham olunduğu cinayət işi üzrə Bakı Apelyasiya Məhkəməsində proses keçirilib.

Civilazerbaijan.com bildirir ki, ilkin baxış iclasında Tofiq Yaqublu da iştirak edib.

36 gündür aclıq edən Yaqublunun məhkəmə zalına beş nəfərin köməyi ilə gətirildiyi bildirilir. Ayaq üstə dayana bilməyən, başı və bədəni əsən Yaqublu məhkəmə zalında “Siz mənim ürəyimsiniz” yazılan vərəqi qaldırıb.

Ailəsi bildirir ki, Yaqublu ayaqüstə dayana bilməyib, Penitensiar Xidmətin işçiləri onu məhkəməyə gətirib və oturmağa kömək edib.

İclas boyu onun bədəni titrəyib və başını sabit saxlamağa çətinlik çəkib.

Həmçinin, mikrofon işləmədiyinə və səsi çətinliklə çıxdığına görə zaldakılar onun sözlərini hakimə çatdırıb.

Tofiq Yaqublu buna belə reaksiya verib: “Məhkəmələrdə mikrofonla yanaşı, məhkəmə sistemi işləmir”.

Siyasətçi ayağa durub ona dəstək üçün gələnlərə “siz mənim ürəyimsiniz” işarəsi göstərib və müvazinətini itirib oturacağa düşüb.

Daha sonra hakimlə Tofiq Yaqublu arasında aşağıdakı dialoq yaşanıb:

Hakim: Sizə hüquq və vəzifələrinizi izah edirəm.

Tofiq Yaqublu: Ehiyac yoxdur, mən 4-cü dəfədir həbs olunuram, hamısını bilirəm. Cinayət məcəlləsinə görə mən azadlıqda olmalıyam. İşə əlavə olunmuş materialları oxumusunuz? 134 səhifəlik…

Hakim: Bəli, son sözünüzü də oxumuşam, hamısını oxumuşam.

Tofiq Yaqublu: Siz görmüsünüz ki, Elnur Nuriyev necə şərəfsizlik edib?

Vəkillər Yaqublunun ev dustaqlığına buraxılması üçün vəsatət qaldırıb.

Vəkil Nemət Kərimli bildirib ki, Yaqublunun həbs qətimkan tədbirinin dəyişdirilməsi onun üçün “ölüm-dirim məsələsidir”.

Digər vəkillər Aqil Layıc və Fəxrəddin Mehdiyev də diqqəti Tofiq Yaqublunun aclıq aksiyasına və pisləşən səhhətinə çəkiblər, bunun insanlıq məsələsi olduğunu qeyd ediblər.

Hakim Zamin İbrahimov Tofiq Yaqublunun ev dustaqlığına buraxılması ilə bağlı vəsatəti təmin etməyib.

Növbəti məhkəmə iclası 20 may 15:00-a təyin olunub.

Məhkəmənin önünə xeyli sayda polis qüvvəsi gətirilib.

İclasdan sonra jurnalistlərə danışan Yaqublunun qızı Nigar Həzi deyib ki, “bu qədər polisin gətirilməsi hakimiyyətimşn Tofiq Yaqubludan nə qədər qorxduğunu” göstərir.

Azərbaycan Xalq Cəbhəsi Partiyasının sədri Əli Kərimli isə deyib ki, məhkəmənin növbəti prosesi mayın 20-ə təyin etməsi “faktiki olaraq Yaqublunu ölümə məhkum etməkdir”.

“Tofiq Yaqublu mayın 20-ə çətin sağ qala. Gözümüzün qarşısında dağ boyda adam əriyir, məhv olur, azadlıqdan, ədalətdən yana özünü fəda edir”, - o deyib.

Nigar Həzi və Əli Kərimli müsahibə verdikləri zaman polislər tərəfindən məhkəmə önündən uzaqlaşdırıblar.

Sosial şəbəkələrdə paylaşılan məlumatlara görə, məhkəmə önünə toplaşan insanlar polis tərəfindən zorakılılqla oradan uzaqlaşdırılıblar.

Yaqublunun qızı Nigar Həzi məhkəmə binasının önünə gələn jurnalistlərə deyib ki, hakim Zamin İbrahimovun qərarı anti-humanistdir:

“Hakim gözləri ilə gördü ki, Tofiq Yaqublu məhkəmə zalında hansı vəziyyətdə oturub, hətta danışmağa halı yox idi. Tofiq Yaqublu optimistliyini itirməyib. Məhkəmə zalına gələn insanlara kağızda yazıb ki, siz mənim ürəyimsiniz. O, bilir ki, cəmiyyətin ona necə dəstəyi var. Bu gün polis qoşununun gəlməsi göstərir ki, onlar Tofiq Yaqubluya olan dəstəkdən narahatdır. Xalqın ona olan sevgisindən çox narahatdırlar. Tofiq Yaqublu həqiqətən də cinayətkardırsa, niyə belə narahat olurdunuz? Niyə bura bu qədər polis tökmüsünüz? Niyə qoymursunuz, insanlar orada toplaşsınlar? İlham Əliyev Tofiq Yaqublunu öldürmək qərarı verdi. Növbəti məhkəmə 20 may saat 15:00-a təyin edildi. O müddətə isə Tofiq Yaqublu həyatda olmayacaq!”

Tofiq Yaqublu 2025-ci il martın 10-da Bakı Ağır Cinayətlər Məhkəməsinin hökmü ilə 9 il azadlıqdan məhrum edilib.

O, aprelin 1-dən azadlığa buraxılması tələbi ilə aclıq aksiyası keçirir.

Yaqublu Cinayət Məcəlləsinin külli miqdarda ziyan vurmaqla dələduzluq və saxta sənəd hazırlama və ya istifadə etmə maddələri ilə təqsirli bilinib. Siyasətçi ittihamları qurama sayır.

Bu, Tofiq Yaqublunun ilk aclıq aksiyası deyil. O, 2020-ci il martın 22-də həbsinə etiraz olaraq 17 gün aclıq etmişdi. Sonradan vəziyyəti pisləşdiyinə görə 4 il 3 aylıq həbs hökmü şərti cəza ilə əvəzlənmişdi.

civilazerbaijan.com