Azərbaycandakı siyasi məhbusların YENİ SİYAHISI

Azərbaycanın Siyasi Məhbuslarına Azadlığı İttifaqı mayın 13-də ölkədəki siyasi məhbus siyahısını dərc edib.

Civilazerbaijan.com bildirir ki, siyahıda ümumilikdə 328 nəfərin adı yer alıb.

Siyahıya alınan şəxslərin 15-i qadındır və məhbuslar fəaliyyət sahələrinə görə 12 fərqli qrupda təsnifləşdiriliblər. Hesabatda ən böyük qrupu 182 nəfərlə dindarlar təşkil edir. Siyahıda həmçinin müxalifət partiyalarının və vətəndaş cəmiyyətinin 44 üzvü, 31 jurnalist və bloger, habelə 8 hüquq müdafiəçisi yer alıb.

Müəlliflər ölkədəki ictimai-siyasi hadisələr və müxtəlif səs-küylü cinayət işləri çərçivəsində həbs olunanları da qeyd ediblər.

Bura “İmişli işi üzrə” 15, “Gəncə işi üzrə” 13, “Tərtər işi üzrə” 8, Avropadan deportasiya olunmuş 6 siyasi mühacir, milli azlıqların 5 fəalı, Söyüdlü kəndindəki etirazlarla bağlı 2, müharibə əleyhinə çıxış edən 2 fəal və ömürlük azadlıqdan məhrum edilmiş 12 şəxs daxildir. Tərtibatçılar qeyd edirlər ki, siyahı yalnız barəsində tam və etibarlı məlumat toplanması mümkün olan şəxsləri əhatə edir.

Birliyin bu ilin yanvarında təqdim etdiyi əvvəlki siyahıda 340 nəfərin adı var idi.

Hüquq müdafiəçiləri Leyla Yunus və Elşən Həsənov tərəfindən tərtib olunan sənəddə vurğulanır ki, ölkədə fərqli düşünən şəxslərə qarşı sistematik repressiyaların təməli 1993-cü ildə qoyulub və hazırda da davam etdirilir. Müəlliflər bildiriblər ki, siyahı Avropa Şurası Parlament Assambleyasının 2012-ci ilin oktyabrında keçirilən sessiyasında qəbul edilmiş 1900 nömrəli qətnamədə müəyyən olunmuş “siyasi məhbus” anlayışının müəyyənləşdirilməsi meyarları əsasında tərtib edilib.

Azərbaycan hakimiyyəti isə ölkədə siyasi məhbusların mövcudluğunu birmənalı şəkildə rədd edir. Rəsmi mövqeyə görə, heç kim fərqli düşüncəsinə və ya siyasi mövqeyinə görə həbs edilmir, saxlanılan şəxslər konkret cinayət əməllərinə görə məsuliyyətə cəlb olunublar.

civilazerbaijan.com