ATİŞ-in Azərbaycan ictimaiyyətinə MÜRACİƏTİ

Azərbaycan Talışların İctimai Şurası ölkə ictimaiyyətinə müraciət edib.

CivilAzerbaijan.com həmin müraciətin tam mətnini təqdim edir:

Azərbaycan Respublikasının tərəqqipərvər ictimaiyyətinə,

Ölkəmizdə ləyaqətli, qürurlu və bərabərhüquqlu vətəndaş cəmiyyəti naminə mücadilə aparan ictimai-siyasi xadimlərə,

Ümumi Evimiz olan Azərbaycanın mötəbər din xadimlərinə, ziyalılarına və elm adamlarına,

Azərbaycan Respublikasının yüksək səlahiyyətli dövlət nümayəndələrinə,

Azərbaycan Respublikasının Kütləvi İnformasiya Vasitələrinə

M Ü R A C İ Ə T

Hörmətli dostlar, möhtərəm cənablar!

Sosial şəbəkələrin imkanlarından yararlanaraq, mənsub olduğumuz talış xalqının taleyində mühüm rol oynaya biləcək bir sıra vacib məsələlərlə bağlı Sizləri narahat etmək istəyirik.

Nəzərinizə çatdırırıq ki, hələ ötən əsrin 30-cu illərində (xüsusilə, 1937-ci ildə) totalitar SSRİ imperiyası talış xalqının adını tarix səhnəsindən silmək üçün onu amansız repressiyaya məruz qoymuşdur! O dövrdə demək olar ki, talış xalqının ictimai-siyasi, ədəbiyyat, mədəniyyət, din xadimləri və digər sahələrdə çalışan çoxsaylı ziyalıları kütləvi repressiya olunaraq güllələndilər, və ya uzaq sürgünlərdə məhv edildilər. Xalqın əksər hissəsi isə tarixən yaşadıqları füsunkar ata-baba torpaqlarından ilan mələyən səhralara köçürüldü. Nəticədə həmin köçkünlərin də bir hissəsi yoluxucu xəstəliklərdən həyatlarını itirdilər...

Artıq indi XXI əsrin ikinci onilliyini başa vurmaqdayıq. Çox böyük təəssüf hissi ilə qeyd edək ki, talış xalqı ötən əsrin 37-ci ilindən üzü bəri məruz qaldığı dəhşətli repressiyalardan hələ də bəraət qazana bilməmişdir.

Məlumat üçün bildiririk ki, Azərbaycan Respublikasının talış əsilli çoxsaylı ziyalılarının birləşdiyi Azərbaycan Talışların İctimai Şurası (ATİŞ) bir ictimai Birlik olaraq, talış xalqının tam reabilitasiyasına nail olmaq və onların Azərbaycan cəmiyyətinə talış kimi inteqrasiyası naminə fəaliyyət göstərir. 21 fevral 2020-ci il tarixdə Azərbaycan Talışların İctimai Şurası “Beynəlxalq Ana dili günü” münasibətilə Bakı şəhərində keçirdiyi tədbirdə “Azərbaycan Respublikasında talış dilinin hazırkı vəziyyəti və bu istiqamətdə təxirəsalınmaz tədbirlər haqqında Mövqe sənədi”ni qəbul etmişdir.

25 fevral 2020-ci il tarixdə ATİŞ-in həmsədrlərinin imzası ilə Azərbaycan Respublikasının Prezidenti cənab İlham Əliyevə (surəti - Azərbaycan Respublikasının Baş nazirinə, Azərbaycan Respublikası Təhsil nazirinə, Azərbaycan Respublikası Prezident Admnistrasiyasının rəhbərinə olmaqla) ölkəmizin köklü, avtoxton xalqı olan talışların ölməkdə olan ana dilinin qorunması və inkişafı naminə təxirəsalınmaz tədbirlər planının həyata keçirilməsi ilə bağlı müraciət ünvanladı. 32 səhifəlik həmin Mövqe sənədi də göndərilən müraciətə əlavə edildi. Ölkəmizin ən ali dövlət orqanlarına ünvanladığımız müraciətlərdən 9 ay vaxt keçməsinə baxmayaraq, Azərbaycan Respublikasının vətəndaşları olaraq, indiyə kimi həmin instansiyalar tərəfindən heç bir rəsmi cavab almamışıq.

Müraciətləri ünvanladığımız müddətdən 2 ay keçdikdən sonra, yəni 25 aprel 2020-ci il tarixdə həmin ali dövlət idarəetmə institutlarının nəzər-diqqətinə bu barədə çatdırmaq məqsədilə göndərdiyimiz teleqramlara da heç bir reaksiya verilməmişdir.

Sonrakı mərhələlərdə ATİŞ olaraq, ictimai fəaliyyətimizi ölkəmizin düçar olduğu “COVİD 19” pandemiyası bəlasından qurtulmaq istiqamətində lazım olan maarifləndirmə, izahat işlərinə və nümunəvi təbliğat kompaniyalarına həsr etmişik. Ən əsası isə, 27 sentyabr 2020-ci il tarixdən başlayaraq ölkəmizin ərazi bütövlüyünün təmin olunması uğrunda gedən şərəfli və şanlı Vətən müharibəsi dövründə Azərbaycan Talışların İctimai Şurasının hər bir üzvü, müzəffər ordumuzun igid, rəşadətli əsgər və zabitlərinin qələbə ruhunun daha da yüksəlməsi naminə təbliğat və təşfiqat işləri aparmışlar.
Ulu Tanrıya şükürlər olsun ki, 9 noyabr 2020-ci il tarixdə şanlı Azərbaycan Ordusu işğalçı Ermənistan ordusunu dizə çökdürərək məğlub etdi!

Beləliklə, Vətənimizin ərazi bütövlüyü təmin edildi! Dilindən və dinindən asılı olmayaraq hər birimiz bu tarixi qələbənin bütün Azərbaycan vətəndaşlarının monolit birliyi və səmimi qardaşlıq ünsiyyəti sayəsində qazanılmasının şahidi olduq! Böyük iftixar hissi ilə onu da qeyd edək ki, bu misilsiz qələbənin qazanılmasında talış əsilli əsgər və zabitlərimiz döyüş meydanlarında misli görünməmiş qəhrəmanlıq, şücaət və rəşadət nümunələri göstərdilər. Nəticədə xeyli sayda şəhidlər, yaralananlar, itkin düşənlər də oldu. Şəhidlərimizin ruhu qarşısında baş əyirik! Allah onları rəhmət eləsin!

Biz talışlar etnik mənsubiyyətimizdən asılı olmayaraq güclü, qüdrətli ölkəmizdə - doğma, azad, demokratik Azərbaycanımızda qürürlu, ləyaqətli, firavan və xoşbəxt yaşamaq istəyirik! İstəyirik ki, övladlarımız özünütanımaz, manqurt və mənəvi cəhətdən şikəst deyil, şəxsiyyətli, ləyaqətli, namuslu, vicdanlı, sağlam düşüncəli əsl Azərbaycan vətəndaşları kimi böyüsünlər!

Hörmətli dostlar, möhtərəm cənablar!
Məhz yuxarıda sadaladığımız səbəbləri əsas götürərək, üzümüzü Sizə - ölkəmizin dəyərli ictimaiyyət nümayəndələrinə, ziyalılara, din xadimlərinə, siyasətçilərə, alimlərə, jurnalistlərə və dövlət məmurlarına tutaraq bildiririk: Qarşıdan 2020-ci ilin sonu - dekabr ayı gəlir! İl tamam olur... Hökümətimiz isə, günü bu günə kimi, ölkə vətəndaşları olaraq, layiqli özünüifadəmizin başlıca komponenti olan Ana dilimizin mühafizə olunması və inkişafı ilə bağlı təqdim etdiyimiz təkliflər paketinə nəinki müsbət və ya mənfi cavab vermişdir, ümumiyyətlə, heç bir cavab belə, verməmişdir!

Azərbaycan hakimiyyətinin müvafiq Ali orqanlarının etinasızlıq göstərərək talış dilinin tədrisi ilə bağlı etdiyimiz müraciətləri cavabsız qoymaları, ölkə vətəndaşları olaraq bizi dərin narahatçılıq hissləri keçirməyə vadar etmişdir! Lakin ümid və inamımızı hələ itirmək istəmirik! Dilemma və fakt qarşısında qalan ATİŞ üzvləri, hal-hazırda növbəti pozitiv və konstruktiv addımların atılması istiqamətində təşkilatdaxili ciddi müzakirələr aparırlar!

Hörmətli dostlar, möhtərəm cənablar!
Biz, talış xalqının nümayəndələri olaraq, özümüz üçün taleyüklü bir məsələ saydığımız öləziyən Ana dilimizin yaşatması, tədrisi və bu istiqamətdə mövcud olan problemlərin həlli naminə ilk növbədə Sizdən kömək istəyirik.

Sizdən xahiş edirik, ölkəmiz üçün fərəhli, bayram əhval-ruhiyyəli, həm də həssas bir məqamda 30 ilə yaxın müddət ərzində qalaqlanmış bu həyati əhəmiyyətli məsələlərin həllində bizə yardımçı olasız. Bu barədə Sizin dəstəyinizə ciddi ehtiyac duyuruq.

Dərin hörmətlə,
Azərbaycan Talışların İctimai Şurasının həmsədrləri:
Hilal Məmmədov
Mehdibəy Səfərov
Ataxan Əbilov
22 noyabr 2020-ci il

civilazerbaijan.com