50 dərman deposu, 500-dən artıq aptek... - Sabiq nazir müavininin fəaliyyəti araşdırılır

Fevralın 3-də Prezident İlham Əliyevin sərəncamı ilə vəzifəsindən azad edilən Səhiyyə nazirinin müavini Elsəvər Ağayev Farmakoloji və Farmakopeya Ekspert Şurasının sədri vəzifəsini də itirib. Bu vəzifə İqtisadiyyat Nazirliyi yanında Dövlət Vergi Xidmətinin Maliyyə Baş İdarəsinin sabiq rəis müavini, hazırda Səhiyyə nazirinin müavini olan Rasim İsmayılova tapşırılıb.

CivilAzerbaijan.com bildirir ki, "Qaynarinfo"nun əldə etdiyi məlumata görə, Elsevər Ağayevin və digər vəzifəli şəxslərin fəaliyəti barədə yoxlamalar aparılıb.

Hələ Teymur Musayev Səhiyyə nazirinin əvəzedicisi olduğu dönəmdə rəhbərlik etdiyi qurumda bu və bu kimi digər neqativ hadisələrin araşdırılması üçün müvafiq tapşırıqlar da verib.

Müvafiq qurumlar da nazirin tapşırığına uyğun olaraq araşdırmalara başlayıb və artıq nəticələr barədə yeni naziri məlumatlandırıblar. Elsevər Ağayevin də rəhbərlik etdiyi sahələrdə də bir sıra ciddi pozuntular aşkarlanıb.

Hesablama Palatasından "Qaynarinfo"ya verilən açıqlamada 2021-ci ildə Səhiyyə Nazirliyində yoxlama aparıldığı təsdiqlənib.

Audit Hesablama Palatasının Kollegiya iclasında müzakirəyə çıxarılıb və qərar qəbul edilib. Digər qurumlarla bərabər, Səhiyyə Nazirliyində də aparılan yoxlamaların nəticələri barədə bu ilin mart ayında hesabat dərc ediləcək.

Elsevər Ağayev uzun illər ən böyük gəlirli və vacib sahə olan "Əczaçılıq və Tibb Sənayesi”, "Dərman və Tibbi Texnika" İstehsalat-Ticarət Birliyinə də rəhbərlik edib.

Məlumata görə, hər iki birliyin nəzdində fəaliyyət göstərən 1000-ə yaxın aptekdə və əczaçılıq mərkəzlərində onun qoyduğu şərtlərlə işlər aparılıb.

Səhiyyə Nazirliyinə məxsus bu birliklərin bəzi mülkləri isə özəlləşdirilərək nazir müavininin yaxın adamlarının adına keçirilib.

Digər 3 nazir müavini ilə yanaşı, pozuntuların nəticəsi olaraq 23 il vəzifədə çalışmış Elsevər Ağayev sonuncu vəzifəsi ilə də vidalaşmalı olub.

Bu günə olan məlumata görə, əczaçılıq sahəsində Azərbaycanda fəaliyyət göstərən 100-dən çox topdansatış dərman deposunun 50-yə yaxını, 3 mindən çox aptekin 500-ə yaxınının Elsevər Ağayevin yaxın çevrəsinə məxsus olduğu deyilir.

Baş verənlərlə bağlı Elsevər Ağayevlə əlaqə saxlasaq da, bu barədə ondan münasibət almaq cəhdlərimiz boşa çıxıb.

civilazerbaijan.com