Rusiya sülhməramlıları Qarabağda qalacaq - RF XİN

Rusiya sülhməramlı kontingentinin mövcudluğuna ehtiyac var və gələcəkdə də eynilə ehtiyac olacaq.

Civilazerbaijan.com bildirir ki, bunu RBK-ya Rusiyanın xarici işlər nazirinin müavini Mixail Qaluzin söyləyib.

Onun sözlərinə görə, bu, "Qarabağın orada qalan sakinlərinin özlərini rahat hiss etməsi üçün" lazımdır. "Qarabağdan gedənlərdən kimlərinsə müəyyən mərhələdə qayıtmaq qərarına gələ biləcəyi istisna deyil. Sülhməramlıların mövcudluğu onlar üçün əlavə rahatlıq amili olacaq", deyə o bildirib.

Sülhməramlıların gələcəkdə bölgədə qalması məsələsi Moskva və Bakı arasında müzakirə və həll olunacaq, deyən Qaluzin sülhməramlıların Bakı və Xankəndi arasında əlaqələri də həyata keçirdiyini qeyd edib. "Qarabağın gələcək inkişafı ilə bağlı çox mürəkkəb məsələlər kompleksi də Qarabağ ermənilərinin nümayəndələri və Azərbaycan hakimiyyəti arasında Rusiya sülhməramlılarının yardımı ilə həll olunur", deyə nazir müavini bildirib.

Xatırladaq ki, Bakı, Yerevan və Moskvanın 10 noyabr 2020-ci il tarixli üçtərəfli bəyanatına əsasən, Qarabağda və Laçın dəhlizi boyunca Rusiya sülhməramlı kontingenti yerləşdirilib. Oraya atıcı silahla silahlanmış 1960 hərbi qulluqçu, 90 zirehli nəqliyyat vasitəsi və 380 ədəd avtomobil və xüsusi texnika göndərilib. Onların yerləşməsi müddəti 5 ildir (2025-ci ilə qədər); münaqişə tərəflərindən heç biri sülhməramlıların regiondan çıxarılmasını tələb etməsə, bu müddət avtomatik olaraq uzadılacaq, Turanın məlumatında qeyd olunur.

Sülhməramlılar Qarabağda 31 post qurublar. 19 sentyabr 2023-cü il tarixində bir günlük müharibədən və ermənilərin böyük hissəsi Qarabağı tərk etdikdən sonra sülhməramlılar yeddi postu ləğv edib.

civilazerbaijan.com