Tramp Parisdə Zelenski ilə görüşdən sonra Ukraynada “dərhal atəşkəsə” çağırıb

Birləşmiş Ştatların prezidenti seçilmiş Donald Tramp Parisdə Fransa və Ukrayna liderləri ilə görüşdən qısa müddət sonra bazar günü Ukraynada dərhal atəşkəsə çağırıb və Kyivin 1000 gündən çox davam edən müharibəyə son qoymaq üçün “razılaşmanın əldə olunmasını istədiyini” deyib.

Civilazerbaijan.com bildirir ki, Tramp Truth Social platformasında paylaşımında Moskva və Kyivin “heç vaxt başlamamalı olan” müharibədə yüz minlərlə əsgər itirdiyini iddia edib.

“Dərhal atəşkəs əldə olunmalı və danışıqlara başlanılmalıdır. Çox sayda insanın həyatı lazımsız yerə məhv edilir, çoxlu ailə məhv edilir”, o, Rusiya prezidenti Vladimir Putini döyüşləri sona çatdırmaq üçün hərəkətə keçməyə çağıraraq bildirib.

Tramp bu açıqlamaları şənbə günü Ukrayna prezidenti Volodimir Zelenski və fransalı həmkarı Emmanuel Makron ilə Zelenskinin daha sonra “konstruktiv” adlandırdığı görüşdən sonra verib.

Həmin gün jurnalistlərə açıqlama verən Zelenski deyib ki, istənilən sülh sazişi “ukraynalılar üçün ədalətli olmalıdır” ki, “Rusiya və Putin və ya digər təcavüzkarların geri qayıtmaq imkanı olmasın”.

Bazar günü başqa bir sosial media paylaşımında Zelenski Rusiyanın 2022-ci il fevralın 24-ü genişmiqyaslı hərbi müdaxiləsindən sonra Ukraynanın 43, 000 əsgərini itirdiyini, daha 370, 000 nəfərin yaralandığını bildirib.

Rusiya və Ukrayna itkilərlə bağlı rəsmi rəqəmləri açıqlamaqdan çəkinir. Lakin Qərb rəsmiləri deyirlər ki, Ukraynanın şərqində son bir neçə ay davam edən ağır səngər döyüşləri hər iki tərəfdən rekord itkilərlə nəticələnib, hər ay on minlərlə ölən və yaralanan olub, Amerikanın Səsinin məlumatında qeyd olunur.

civilazerbaijan.com