Volodimir Zelenskidən Donald Trampa CAVAB

Ukrayna prezidenti Volodimir Zelenski ABŞ prezidenti Donald Trampın Kiyevi müharibədə günahlandırmasına cavab verib.

Civilazerbaijan.com bildirir ki, fevralın 19-da mətbuat konfransında danışan Ukrayna dövlət başçısı deyib ki, Rusiyadan çoxlu dezinformasiyanın gəldiyini görür.

"Təəssüf ki, prezident Tramp... bu dezinformasiya köpüyündə yaşayır", –o bildirib.

Zelenski həmçinin onun populyarlıq reytinqinin 4 faiz olduğu iddialarını Rusiya dezinformasiyası kimi rədd edib və Rusiyanın müharibə müddətində onu əvəz etmək cəhdlərinin uğursuz olacağını bildirib.

"Heç vaxt populyarlıq reytinqləri, xüsusilə də özümün və ya digər liderlərin reytinqləri haqqında şərh vermirəm", - deyən Zelenski ən son sorğunun 58 faiz ukraynalının ona güvəndiyini göstərdiyini qeyd edib.

"Beləliklə, əgər kimlərsə məni indi əvəz etmək istəyirsə, bu, baş tutmayacaq. 4 faizdən danışarkən, bu dezinformasiyanı görürük və başa düşürük ki, bu, Rusiyadan gəlir", –o əlavə edib.

Ukrayna dövlət başçısının bu şərhi Trampın Zelenskinin Ukraynada 4 faizlik reytinqə sahib olduğu iddiasından sonra gəlib.

Prezident Zelenski mətbuat konfransında bu müharibədə Rusiyanın "günahkar tərəf" olduğunu vurğulayıb.

"Yəqin ki, hər şeyi razılaşmalarla həll edə biləcəyinizi düşünürsünüz. Bu, mümkünsüzdür. Ukraynada heç kim Putinə inanmır. Bizə aydın təhlükəsizlik zəmanətləri lazımdır", - o deyib.

"Kit Kelloq (ABŞ prezidentinin Rusiya və Ukrayna üzrə xüsusi elçisi) bunu bu gün görməlidir... Gəlsin, Kiyevə və digər şəhərlərə getsin. Paytaxtın 20-30 faizi yoxdur, çünki müharibədə məhv olub", - Zelenski bildirib.

O, ABŞ rəsmisinə çıxıb sadə ukraynalılarla danışmağı və onlara Trampın şərhləri barədə nə düşündüklərini soruşmağı təklif edib: "Qoy insanlarla danışsın. Öz prezidentlərinə inanırlarmı, yoxsa Putinə? Gəlsin, Tramp haqqında soruşsun, insanların Trampın açıqlamalarından sonra nə düşündüklərini soruşsun. Sadəcə insanlarla danışmaq vacibdir. Qoy hara getmək istədiyini özü seçsin. Onun burada səfiri var. Öz gözləri ilə baş verənləri görməsi vacibdir. Sonra mən ön cəbhəyə onunla getməyə hazıram. Gəlsin, hərbiçilərlə danışsın".

civilazerbaijan.com