Albaniya baş naziri süni intellektlə işləyən "bot"u nazir təyin edib

Albaniyada süni intellektlə işləyən "bot" nazir təyin olunub. Albaniyanın baş naziri Edi Rama bildirib ki, "nazir" dövlət satınalmalarına rəhbərlik edəcək. O, qərarı hökumətdə korrupsiyanı azaltmaq məqsədilə izah edib.

Civilazerbaijan.com bildirir ki, Diella" (albanca "günəş" deməkdir - red.) adını daşıyan "bot" ilkin olaraq bu ilin yanvarında vətəndaşlara dövlət xidmətlərindən onlayn istifadə etməyə kömək etmək məqsədilə yaradılıb.

"Diella" "e-Albania" portalında istifadəçilərə məsləhət verir, onlara səsli mesajlar vasitəsilə dövlət xidmətlərinin təxminən 95%-nə rəqəmsal şəkildə çıxış əldə etmək üçün lazım olan bütün bürokratik işlərdə kömək edir.

""Diella" ictimai tenderləri 100% korrupsiyadan azad etməyə kömək edəcək”, – Rama sentyabrın 11-də bildirib.

Ramanın sözlərinə görə, "Diella" dövlətin özəl şirkətlərlə bağladığı bütün tenderləri araşdıracaq və hər birinin üstünlüklərini "obyektiv şəkildə" qiymətləndirəcək.

May ayında yenidən hökumət başçısı seçilmiş Rama daha əvvəl bəyan etmişdi ki, süni intellekti "korrupsiyaya qarşı effektiv vasitə" kimi görür və bunun rüşvət və təhdidləri aradan qaldıra biləcəyinə inanır.

Albaniyada dövlət tenderləri uzun müddət korrupsiya qalmaqallarının mənbəyi olub.

Mütəxəssislər bildirirlər ki, ölkə narkotik və silah qaçaqmalçılığından əldə olunan pulların yuyulması üçün beynəlxalq cinayətkar qruplar üçün bir mərkəzə çevrilib və korrupsiya hökumətin yuxarı eşelonlarına qədər sirayət edib, Toplum TV-nin məlumatında qeyd olunur.

civilazerbaijan.com