BMT Əl-Şaraaya qarşı sanksiyaları LƏĞV EDİB

Birləşmiş Millətlər Təşkilatının (BMT) Təhlükəsizlik Şurası Suriya prezidenti Əhməd Əl-Şaraaya qarşı sanksiyaları ləğv edib.

Civilazerbaijan.com bildirir ki, sanksiyaların aradan qaldırılması üçün qətnaməni Təhlükəsizlik Şurasının daimi üzvlərindən biri olan ABŞ irəli sürüb. Bu, Əl-Şaraanın noyabrın 10-da Ağ Evə planlaşdırılan səfərindən öncəyə təsadüf edib. BMT, həmçinin, Suriya daxili işlər naziri Anas Xattab üzərinə qoyulmuş sanksiyaları da ləğv edib.

Suriya xarici işlər naziri sanksiyaların ləğv olunmasını alqışlayaraq sosial mediada yazıb: "Suriya ABŞ-yə və dost ölkələrə ölkəmizə və xalqımıza dəstək verdikləri üçün təşəkkürünü bildirir."

Bu səfər Əl-Şaraanın bu il ABŞ-yə ilk səfəri olmayacaq. O, sentyabrda son 60 il ərzində Nyu-Yorkda BMT Baş Assambleyasında çıxış edən ilk Suriya lideri olub.

Əl-Şaara çıxışında bildirib ki, Suriya "dünyadakı millətlər arasında öz haqq etdiyi yerini geri qaytarır."

Əl-Şaara əvvəllər "əl-Qaidə" terror təşkilatı ilə əlaqəli olan İslamçı qrup "Həyat Tahrir əl-Şam"-ın (HTS) lideri kimi BMT sanksiyaları altında idi. ABŞ iyul ayında HTS-i xarici terror qrupları siyahısından çıxarıb. Əl-Şaara ötən ilin dekabrında 13 illik vətəndaş müharibəsini sona çatdıraraq Bəşər Əsədi devirmiş üsyançı hücuma rəhbərlik etdikdən sonra keçid dövrü prezidenti təyin edilib.

ABŞ prezidenti Donald Tramp və Əl-Şaara ilk dəfə may ayında Trampın Yaxın Şərq səfəri çərçivəsində Riyadda görüşüblər. Bu görüşdən sonra ABŞ prezidenti Əl-Şaaranı "çox sərt bir keçmişə malik" kimi təsvir edib.

civilazerbaijan.com