6 gün əvvəl yaranan şirkəti kimlər tenderin qalibi elan edib?

Əziz Əliyev adına Sumqayıt Tibb Kolleci tərəfindən keçirilən tender müsabiqəsinin (kotirovka sorğusu) qalibi "ZZ-Ticaret” MMC olub. Yeniavaz.com xəbər verir ki, "ZZ-Ticaret” MMC Sumqayıt Tibb Kollecinin sifarişi ilə bu quruma maşın və avadanlıqlar satacaq.

Qeyd olunan mallar üçün Sumqayıt Tibb Kolleci "ZZ-Ticaret” MMC-yə 9 min 840 manat ödəyəcək.

Məlumata görə, "ZZ-Ticaret” MMC – 27.07.2020-ci il tarixində dövlət qeydiyyatına alınıb.

Sumqayıt Tibb Kolleci müsabiqəni 06.08.2020-ci il tarixində elan edib. Bu isə o deməkdir ki, tender müabiqəsinin qalibi olan MMC tender elanının verilməsindən cəmi 10 gün əvvəl yaranıb. Bu günlərin də 4-ü Qurban bayramı ilə əlaqədar olaraq qeyri iş günləri olub.

"ZZ-Ticaret” MMC barədə açıq internet resurslarda heç bir məlumata rast gəlmək mümkün deyil.

Cəmi 6 gün (iş günü) əvvəl yaranan və 9,8 min manatlıq tenderin qalibi olan MMC Bakı şəhəri, Nərimanov rayonu, Mustafa Kamal Atatürk, ev 15, m. 2 ünvanında qeydiyyatdadır.

Nizamnamə kapitalı 5 manat olan MMC-nin qanuni təmsilçisi Rəsulov Zamin Zahir oğludur.

"Dövlət satınalmaları haqqında" Qanunun 6-cı maddəsində malgöndərənlərin (podratçıların) ixtisasına dair tələblər yer alıb. Həmin maddənin 6.2.1-ci bəndində açıq şəkildə yazılır ki, satınalma müqaviləsinin icrasını təmin etmək üçün müvafiq sahədə peşəkarlığın, təcrübənin, texniki və maliyyə imkanların, işçi qüvvəsinin, idarəetmə səriştəsinin, etibarlığın olması lazımdır. Tender müsabiqəsindən cəmi 6 gün əvvəl yaranan bu şirkətin hansı peşəkarlığa və təcrübəyə sahib olacağı da aydın deyil.

Ə.Əliyev adına Sumqayıt Tibb Kolleci 1969-cu ildən fəaliyyətə başlayıb. 2010-cu ildən Ə.Əliyev adına Sumqayıt Tibb Kolleci adlandırılıb. Kollecin direktoru tibb elmləri doktoru Rəfayıl Eyvazovdur.

civilazerbaijan.com