İstefa verən baş nazirdən gözlənilməz AÇIQLAMA

Livanın sabiq baş naziri Səad Həriri istefası ilə əlaqədar açıqlama verib.

SİVİL.AZ "Qaynarinfo"ya istinadən xəbər verir ki, Həriri sahibi olduğu "Future" televiziyasına danışıb.

"Öz həyatım məni maraqlandırmır, məqsədim ölkəmi xilas etməkdir. İstefamın normal şəkildə baş vermədiyini bilirəm, amma bəzi təhlükəsizlik tədbirləri görməli idim. İstefa mətnini mən qələmə almışam. Məqsədim müsbət şok effekti yaratmaq, insanların oyanmasına çalışmaq idi. Livan hazırda ciddi proseslərdən keçir. Hizbullahın siyasi fəaliyyətinin əleyhinə deyiləm, lakin ölkənin məhvinə icazə vermək də lazım deyil. Ölkəmizdəki bəzi yanlışları düzəltməli, müstəqil siyasət yürütməliyik. ABŞ-dan başqa ərəb ölkələrinin də sanksiyaları ilə üzləşməməliyik. Səudiyyə Ərəbistanı kralı Kral Salman məni oğlu kimi görür. Mən də vəliəhd şahzadə Məhəmməd İbin Salmana hörmətlə yanaşıram" deyən sabiq baş nazir Səudiyyədə son günlərdə baş verən həbs və dəyişikliklərlə əlaqəsi olmadığını vurğulayaraq tezliklə ölkəsinə qayıdacağını və istefa ilə əlaqədar lazım olan hüquqi öhdəlikləri yerinə yetirəcəyini vurğulayıb.

Həriri həmçinin qeyd edib ki, İranın ərəb ölkələrinin daxili işlərinə müdaxiləsi yolverilməzdir.

Qeyd edək ki, Səad Həriri qısa müddət əvvəl Səudiyyənin paytaxtı Riayda səfəri zamanı gözlənilmədən istefa vermiş və bu günə qədər məsələ ilə bağlı açıqlama verməmiş və ölkəsinə qayıtmamışdı. Livan rəsmiləri baş nazirin Səudiyyədə zorla saxlanıldığını iddia edirdilər.

civilazerbaijan.com