İran İlham Əliyevin bəyanatlarına CAVAB VERİB

Xəbərin çap versiyası
Tarix: 28-09-2021, 18:26


Rəsmi Tehran Prezident İlham Əliyevin İranın Azərbaycanla sərhəddə niyə hərbi təlimlər keçirdiyini anlamaması barədə dünənki bəyanatına cavab verib.

CivilAzerbaijan.com
bildirir ki, İran Xarici İşlər Nazirliyinin mətbuat katibi Səid Hatibzadə Azərbaycan Prezidentinin İranla Azərbaycan sərhəddində keçirilən hərbi təlimlərə verdiyi qiyməti "məyusedici" adlandırıb.

"İki ölkənin etimadlı münasibətləri fonunda Azərbaycan prezidentinin bu cür qiymətləndirmələri çox məyusedicidir", - Hatibzadə çərşənbə axşamı keçirilən brifinqdə deyib.

Onun sözlərinə görə, bu mövzu (hərbi təlimlər) Nyu-Yorkda keçirilən görüşdə İran və Azərbaycan Xarici İşlər nazirləri arasında ətraflı müzakirə olunub və onların davam etdirilməsi barədə razılıq əldə edilib.

"İran hər zaman hər hansı bir ərazinin işğalına qarşı olub və ölkələrin suverenliyinə, sərhədlərinə və ərazi bütövlüyünə hörmət edib", - o deyib.

İranın Azərbaycanın sərhədləri yaxınlığında bilavasitə keçirilən hərbi təlimlərə toxunan Hatibzadə nədənsə İsraili xatırladıb.

"Bu, təhlükəsizlik məsələsidir və (təlimlər) bütün regionun sabitliyi üçün keçirilir. İran, əlbəttə ki, öz sərhədləri yaxınlığında sionist rejimin mövcudluğuna dözməyəcək və öz təhlükəsizliyi üçün lazım olan hər şeyi edəcək", - Hatibzadə bildirib.

Eyni zamanda, iranlı diplomat Tehranın Bakının onun suverenliyinə hörmət etmək tələbinə məhəl qoymaması ilə bağlı İlham Əliyevin ittihamlarına cavab verməyib. İran Azərbaycanın təkidli xəbərdarlıqlarına baxmayaraq, yük maşınlarını Qarabağa göndərməkdə davam edir.

Turanın məlumatında qeyd olunur ki, bir gün öncə Azərbaycan prezidenti İlham Əliyev "Anadolu" agentliyinə müsahibəsində İranın Azərbaycan sərhədlərinin yaxınlığında hərbi təlimlər keçirməsini "anlaşılmaz" adlandırıb. "Hər bir ölkə öz ərazisində hərbi təlimlər keçirməyə haqlıdır, amma nəyə görə məhz indi və nə üçün bizim sərhədimizdə?"- Əliyev deyib və ümid etdiyini bildirib ki, İranla uzunmüddətli əməkdaşlığa xələl gəlməyəcək.

civilazerbaijan.com



Diqqətinizi çəkə biləcək digər xəbərlər
{sape_links}{sape_article}



Facebook səhifəmiz