“Azadlıq” qəzetinin bölgə müxbirinə hökm oxundu

Şəki Ağır Cinayətlər Məhkəməsində “Azadlıq” qəzetinin bölgə müxbiri Elçin İsmayıllının məhkəmə prosesi başa çatıb.

SİVİL.AZ APA-ya istinadla xəbər verir ki, hakim Rəşid Hüseynovun sədrlik etdiyi iclasda hökm oxunub. Hökmə əsasən, E. İsmayıllı 9 il müddətinə azadlıqdan məhrum edilib.

Qeyd edək ki, dövlət ittihamçısı E. İsmayıllıya 10 il həbs istəmişdi.

Elçin İsmayıllı bu il fevralın 17-də İsmayıllı rayonunda həbs olunub. O, İsmayıllı rayonunda vəzifəli şəxslərdən haqqında rüsvayedici məlumat yaymaq hədəsi ilə pul tələb etməkdə ittiham olunur.

E.İsmayıllı ittiham üzrə özünü təqsirli bilməyib. Saxlanılarkən üzərində olan 1000 manatı tanışı Azər Abbasovdan borc aldığını deyib.

Onun barəsində Cinayət Məcəlləsinin 182-ci (hədə-qorxu yolu ilə pul tələb etmə) və 308-ci (vəzifəsindən sui-istifadə) maddələri ilə cinayət işi başlanıb.

civilazerbaijan.com