Ruben Vardanyan saxlanılaraq Bakıya gətirilib

Sentyabrın 27-də tanınmayan "Dağlıq Qarabağ Respublikasının dövlət naziri" vəzifəsində çalışmış Ruben Vardanyan Azərbaycandan Ermənistan istiqamətində hərəkət edərkən "Laçın" sərhəd-buraxılış məntəqəsində saxlanılıb.

Civilazerbaijan.com bildirir ki, bu barədə Azərbaycan Dövlət Sərhəd Xidməti (DSX) məlumat yayıb.

Məlumatda bildirilir ki, Ruben Vardanyan Dövlət Sərhəd Xidmətinin Çevik Hərəkət Qüvvələri əməkdaşlarının müşayiəti ilə Bakı şəhərinə gətirilib.

"Saxlanılan şəxs barəsində müvafiq qərar qəbul edilməsi üçün aidiyyəti dövlət orqanlarına təhvil verilib", - məlumatda vurğulanır.

Qeyd edək ki, Vardanyan 2022-ci ilin noyabrından 2023-cü ilin fevralınadək separatçı rejimin hökumət başçısı olub.

Turanın məlumatına görə, Ruben Vardanyanın həyat yoldaşı Veronika Zonabend ərinin həbs olunmasına cavab olaraq erməni telegram kanalları vasitəsilə açıqlama yayıb. O bildirib ki, tanınmış xeyriyyəçi, iş adamı və Artsax Respublikasının keçmiş dövlət naziri Vardanyan Azərbaycan hakimiyyəti tərəfindən Azərbaycan işğalından qaçan minlərlə erməni ilə birlikdə artsaxı tərk etmək istəyərkən həbs edilib. Zonabend ərinin rifahından dərin narahatlığını dilə gətirib və beynəlxalq ictimaiyyətdən dəstək istəyərək dərhal sərbəst buraxılmasına çağırıb.

Qeyd etmək vacibdir ki, Ruben Vardanyan 2022-ci ilin oktyabrında Qarabağa gəlməzdən əvvəl Rusiya vətəndaşlığından imtina edbi. Bu qərar, həmin il dekabrın 22-də Vardanyanın Rusiya vətəndaşlığından məhrum edilməsi barədə fərman verən Rusiya prezidenti Vladimir Putinin sürətli reaksiyasına səbəb olub. Rusiya xarici işlər naziri Sergey Lavrov da dekabr ayında Rusiya Federasiyasındakı Vardanyandan açıq şəkildə ayrıldığı rəsmi bir açıqlama verib. Lavrov, Vardanyanın artıq Rusiya vətəndaşı sayılmadığını təkrarlayaraq, Rusiya hakimiyyətinin onunla heç bir əlaqəsi olmadığını və hərəkətlərinə görə heç bir məsuliyyət daşımadığını vurğulayıb.

civilazerbaijan.com