ABŞ Dövlət Departamentindən Azərbaycanda keçirilmiş prezident seçkiləri ilə bağlı AÇIQLAMA

ABŞ Dövlət Departamenti Azərbaycanda keçirilmiş prezident seçkilərinə reaksiya verib. Seçkilərdə hazırkı prezident İlham Əliyev 90 faizdən çox səslə beşinci müddəti qazanıb. Eyni zamanda ATƏT müşahidəçiləri demokratiya ilə bağlı "ciddi məsələlər" qaldırıblar.

Civilazerbaijan.com bildirir ki, bu barədə Dövlət Departamentinin nümayəndəsi Turan-a açıqlamasında söyləyib.

"Biz prezident seçkilərinin əsl rəqabət olmadan məhdud şəraitdə keçirilməsilə bağlı ATƏT-in Demokratik Təsisatlar və İnsan Hüquqları Bürosunun müşahidə missiyasının müşahidələrini və narahatlığını bölüşürük", - Dövlət Departamentinin nümayəndəsi bildirib.

"Azərbaycan öz Konstitusiyasında fundamental azadlıqlara və demokratik proseslərə sadiqliyini ifadə edir. Biz Azərbaycanı bu öhdəlikləri, eləcə də Demokratik Təsisatlar və İnsan Hüquqları Bürosunun əvvəlki və gələcək tövsiyələrini yerinə yetirməyə çağırırıq", - Dövlət Departamentinin nümayəndəsi deyib.

ATƏT öz rəyində belə qənaətə gəlib ki, seçkilər "rəqabətsiz" olub və "məhdud mühitdə keçirilib". Bülletenlərin atılması, dəfələrlə səsvermə, tənqidçi jurnalistlərin həbsi, kütləvi informasiya vasitələrinin sərbəst fəaliyyətinin olmaması kimi faktlar qeyd olunub.

civilazerbaijan.com