Vaşinqton Türkiyə ilə "düşmənçilik axtarmır" - AÇIQLAMA

"Vaşinqton Türkiyə ilə münasibətləri gərginləşdirməyə çalışmır, əksinə münasibətlərin "sabit və proqnozlaşdırıla biləcəyinə" ümid edir".

CivilAzerbaijan.com bildirir ki, bunu ABŞ-Türk diplomatiyasında iştirak edən yüksək səviyyəli bir ABŞ diplomatı, şənbə günü TURANa söyləyib.

Prezident Biden dünən rəsmi olaraq Birinci Dünya Müharibəsi dövründə Osmanlı İmperiyasındakı erməni əhalisinin kütləvi qırılmasını "soyqırım" adlandıraraq əsas müttəfiqlərindən biri ilə gələcək diplomatik münasibətləri təhlükəyə atdı. Amerikalı bir diplomat TURANa adının açıqlanmaması şərtilə, "Türkiyənin cavabı "tamamilə proqnozlaşdırılan idi", - deyib.

Diplomat Vaşinqtonla Ankara arasındakı münasibətlərin son illərdə kəskin şəkildə pisləşdiyini və "açıq şəkildə səhv istiqamətə doğru irəlilədiyini" söyləyib. Ankaranın Rusiyanın S-400 hava müdafiə sistemini əldə etmək qərarını, eləcə də İŞİD və siyasi mübahisələri və kürd problemini qeyd edib.

"Ölkələrimizin bir-birləri ilə dürüst danışmağının və irəliləməyin vaxtı gəldi", - deyə mənbə əlavə edib.

Ağ Evin iki lider arasındakı cümə günü keçirdiyi telekonfransdan sonra hazırladığı hesabatda deyildiyi kimi, Bidenin prezident Ərdoğanla iyun ayında Brüsseldə görüşməsi planlaşdırılır.

Vaşinqtondakı tənqidçilərə görə, Biden administrasiyası yeni xarici siyasət taktikasını yeridir - “Təzyiqləri artırarkən dialoqa ehtiyac olduğunu bildirmək”.

Bununla birlikdə, Prezident Biden Ermənilərin Xatirə Günü ilə bağlı verdiyi açıqlamada İstanbulu deyil, Osmanlı paytaxtı Konstantinopolu qeyd edərək müasir Türkiyəyə barmaq göstərməkdən çəkindi.

civilazerbaijan.com