Türkiyədə bələdiyyə seçkilərində Ərdoğanın partiyası MƏĞLUB OLUB

Martın 31-də Türkiyədə keçirilən bələdiyyə seçkilərində səslərin 99 faizindən çoxu hesablanıb.

Civilazerbaijan.com bildirir ki, seçkilərin nəticələrinə əsasən, Cümhuriyyət Xalq Partiyasının (CHP) 37,71 faizlə birinci, hakim Ədalət və İnkişaf Partiyasının isə 35,53 faizlə ikinci sırada olduğu məlumat verilib.

Növbəti sıralama belədir: Yenidən Rifah Partiyası (YRP): 6.18, DEM: 5.65, MHP: 4.98, İYİ Partiyası: 3.78 faiz.

Qeyd olunur ki, bu nəticə AKP-nin 2002-ci ildə hakimiyyətə gəlişindən bəri aldığı ən ağır zərbədir:

“Həmçinin seçkilərdə CHP bir sürpriz etdisə, digərini Yenidən Rifah Partiyası (YRP) etdi. YRP CHP və AKP-dən sonra ən çox səs toplayıb”.

Bundan əlavə, AKP-nin namizədlərindən 24-ü, CHP-nin namizədlərindən isə 35-i ölkənin müxtəlif şəhərlərinin bələdiyyə başçısı vəzifəsinə seçilib:

“Hakim partiya 12, CHP üzrə 14 böyük şəhərdə seçkiləri qazanıb”.

Yüksək Seçki Qurumunun ilkin nəticələrinin bu gün açıqlanacağı bildirilir.

Türkiyə Prezidenti Rəcəb Tayyib Ərdoğan martın 31-dən aprelin 1-nə keçən gecə tərəfdarlarına ünvanladığı müraciətdə partiyasının seçkilərdə istənilən nəticəni əldə etmədiyini etiraf edib:

“Millət xəbərdarlığını, təqdirini sandıq vasitəsilə edir. Biz dik duracağıq. 31 mart bizim üçün son deyil, dönüş nöqtəsidir. 31 mart seçkilərində türk milləti mesajlarını siyasətçilərə çatdırmaq fürsəti olaraq qutudan istifadə etdi. Bu seçkinin qalibi bizim demokratiyamız, milli iradəmizdir, bütün 85 milyon insandır. Millətimiz seçkidə qalib gələn namizədlərin qabağına çıxdı. Seçki qutusunun gücünü gücləndirən hər kəs qalib gəlib”.

R.T.Ərdoğan seçkinin nəticələrini müzakirə edəcəklərini vurğulayıb:

“Nəticələri partiyamızın orqanlarında dəyərləndirib, özümüzə tənqidimizi cəsarətlə aparacağıq. Seçki qutularının nəticələri göstərir ki, biz itki yaşayırıq. Bu yerli əsaslı azalmanın səbəbini müzakirə edib problemləri müəyyənləşdirib, lazımi müdaxilələri edəcəyik”.

“Heç bir halda millətimizin qərarına hörmətsizlik etməyəcəyik. Millətlə inadkar olmaqdan uzaq olacağıq. Ən obyektiv şəkildə ağıl və vicdan tərəzisində özümüzü çəkərək addımlarımızı atacağıq. Seçki marafonu başa çatıb və bu gündən seçki dəftərini bağlamaq belə qazancdır. 4 il çox vaxtdır, bu dövrü millətin vaxtını itirəcək müzakirələrlə keçirə bilmərik. Biz öhdəliklərimizin fərqindəyik. Daha çox zəlzələ zonasının bərpasına, iqtisadi problemlərə və aktual məsələlərə diqqət yetirəcəyik”,- deyə Türkiyə rəhbəri əlavə edib.

O həmçinin populizmdən uzaq olacaqlarını da bildirib:

“Ölkəmizə, millətimizə, gələcək nəsillərə bədəlini ödəyəcək populist addımlardan uzaq olacağıq. İqtisadi proqramımızın nəticələrini, xüsusilə inflyasiyanı ilin ikinci yarısında görməyə başlayacağıq. Uğurlu əməliyyatlarımızla mütləq separatçı təşkilata ölümcül zərbə vuracağıq. Cənub sərhədlərimizdən kənarda terrorçuların qurulmasına imkan verməyəcəyik. Türkiyənin beynəlxalq rolunu və əsas mövqeyini gücləndirəcək addımları davam etdirəcəyik”, Meydan TV-nin məlumatında qeyd olunur.

civilazerbaijan.com