Bakıda Azərbaycanın gənc rəssamlarının sərgisi keçiriləcək

Dekabrın 8-dən 28-dək Bakıdakı “Natəvan” qalereyasında Azərbaycanın gənc rəssamlarının qrup halında sərgisi keçiriləcək. “Spektr” adlı bu sərgidə Orxan Qarayev, Bəhruz Kəngərli, İmran Mehdiyev və Cavid İlhamın işləri nümayiş etdiriləcək.

SİVİL.AZ-ın məlumatına görə, tədbirin təşkilatçıları bildiriblər ki, ekspozisiya tamaşaçılar üçün hər gün saat 11-dən 17-dək açıq olacaq.

“Spektr” termini - fizikadan fəlsəfəyə keçmiş anlayışdır. İnsanın dünyaya baxışını, onun ətraf aləmə münasibətini də spektr adlandırmaq olar. Hər kəs rəngləri və konturları özünəməxsus tərzdə görür, görmə vasitəsilə alınan informasiyanı başqalarından fərqli şəkildə qavrayır və gördüklərini özünəməxsus üsullarla əks etdirir. Orxan Qarayev, Bəhruz Kəngərli, İmran Mehdiyev və Cavid İlhamın bu sərgidə nümayiş etdirilən işləri bizim yaşadığımız mühitdə sınan şüanın müxtəlif spektrlərdir. Gənc rəssamların hər biri bizi əhatə edən dünyanı özünəməxsus tərzdə qavrayır. Hər rəssamın öz yaradıcılıq üslubu var. Onların işləri müəlliflərin daxili aləminin spektrini əks etdirir. (AZƏRTAC)

civilazerbaijan.com