Ələsgər Məmmədlinin saxlanma videosunu yayan həkim işdən çıxarılıb

Həkim Aydın Əliyev çalışdığı "İstanbul" klinikasından çıxarıldığını bildirir.

Civilazerbaijan.com bildirir ki, bu barədə Aydın Əliyev özü Turan İnformasiya Agentliyinə məlumat verib.

A.Əliyevin bildirməsinə görə, martın 12-də klinikanın rəhbərliyi ona işdən azad edildiyini çatdırıb:

"Dedilər ki, sabahdan işə gəlmə".

Həkim bunun səbəbini yaxın günlərdə baş verən bəzi hadisələrlə əlaqələndirir:

"Mənim bacımın həyat yoldaşı Ələsgər Məmmədli həbs olundu və mən onun qanunsuz həbsinə münasibət bildirmişəm. Görünür ki, bu kiminsə xoşuna gəlməyib".

A.Əliyev qeyd edib ki, o işdən azad olunması ilə bağlı ərizəyə qol çəkməyib:

"Mənim klinika ilə iş müqaviləm, sertifikatlarım, vergi, sosial ödənişlərim, hamısı qaydasındadır. Əslində indi klinika mənə təzminat ödəməlidir".

Bu açıqlamaya, hələlik, sözü gedən klinkanın və rəsmi qurumların münasibətini öyrənmək mümkün olmayıb.

A.Əliyev martın 7-də Toplum TV-nin təsisçisi Ələsgər Məmmədlinin "İstanbul" klinikasının önündə saxlanılma videosunu öz sosial şəbəkə hesabından paylaşmışdı. Daha sonra o, Ə.Məmmədlinin həbsi ilə bağlı açıqlamalar yayaraq bunu tənqid etmişdi.

Qeyd edək ki, son bir həftədə Toplum TV-nin təsisçisi Ələsgər Məmmədli, bu internet televiziyasının bəzi əməkdaş və ayrı-ayrı ictimai fəallar qaçaqmalçılıqda ittiham edilərək həbs olunublar.

Onların heç biri ittihamı qəbul etmir, bunu qurama iş kimi dəyərləndirirlər.

civilazerbaijan.com